थाइल्यान्डमा अगस्ट ९ र १० मा सम्पन्न आठौँ ‘हिरोज’ अन्तर्राष्ट्रिय तेक्वान्दो च्याम्पियनसिपमा दाङको घोराहीकी सुनिता बिष्टले नेपालको प्रतिनिधित्व गर्दै निर्णायकको भूमिका निर्वाह गरिन्।

अन्तर्राष्ट्रिय तेक्वान्दो खेलाडी र राष्ट्रिय तेक्वान्दो प्रशिक्षकसमेत रहेकी उनले यसअघि २५ वर्षको उमेरमा काजकिस्तानमा आयोजित अन्तर्राष्ट्रिय तेक्वान्दो रेफ्री सेमिनार उत्तीर्ण गर्दै नेपालकै सबैभन्दा कान्छी अन्तर्राष्ट्रिय निर्णायक बन्ने सफलता हासिल गरेकी थिइन्।

आफ्नो क्षमतामा विश्वास गर्दै र विभिन्न चुनौतीहरू पार गर्दै अन्तर्राष्ट्रिय मञ्चमा पुगेकी बिष्ट हाल अल्फा तेक्वान्दो डोजाङ सञ्चालन गर्दै नयाँ खेलाडी उत्पादनमा सक्रिय छिन्।

उनको भनाइमा, खेल केवल प्रतिस्पर्धा मात्र नभई जीवनपरिवर्तनको माध्यम हो, जसले अनुशासन, आत्मविश्वास र लक्ष्यप्रतिको प्रतिबद्धता सिकाउँछ।

थाइल्यान्डमा भएको यो सहभागिता उनले मात्र होइन, नेपालका खेलक्षेत्रका लागि पनि प्रेरणादायी उपलब्धि बनेको छ, जसले भावी पुस्तालाई अन्तर्राष्ट्रिय खेलमञ्चमा अघि बढ्न थप ऊर्जा प्रदान गर्ने सम्भावना देखाएको छ।