ग्लोबल आइएमई बैंक लिमिटेड र सांग्रिला डेभलपमेन्ट बैंक लिमिटेडबीच गैरकोष आधारित बैंकिङ सुविधा उपलब्ध गराउने समझदारी पत्रमा हस्ताक्षर भएको छ। सम्झौतामा ग्लोबल आइएमई बैंकका प्रमुख कार्यकारी अधिकृत (सीईओ) सुरेन्द्रराज रेग्मी र सांग्रिला डेभलपमेन्ट बैंकका सीईओ सुयोग श्रेष्ठले संयुक्त रूपमा हस्ताक्षर गरेका हुन्।

सम्झौता अनुसार सांग्रिला डेभलपमेन्ट बैंकका ग्राहकहरूले आवश्यक पर्ने गैरकोष आधारित बैंकिङ सेवा-जस्तै प्रतीत पत्र (लेटर अफ क्रेडिट), बैंक ग्यारेन्टी, डकुमेन्ट अगेन्स्ट पेमेन्ट, डकुमेन्ट अगेन्स्ट असेप्टेन्स, तथा ट्रेड ट्रान्जेक्सन बैंकिङ-ग्लोबल आइएमई बैंकमार्फत पाउनेछन्।

ग्लोबल आइएमई बैंकका अनुसार यस कदमले सांग्रिला बैंकका ग्राहकहरूलाई थप सहजता र सुविधा मिल्नेछ। रेग्मीले समझौता हस्ताक्षरपछि भने, “हाम्रो उद्देश्य सहकार्यमार्फत ग्राहकलाई उच्चस्तरीय बैंकिङ सेवा प्रदान गर्नु हो।”

ग्लोबल आइएमई बैंक हाल मुलुकको ७७ जिल्लामा ३५२ शाखा, ३८४ एटिएम, १५५ शाखारहित सेवा, ६८ एक्सटेन्सन तथा राजस्व संकलन काउन्टर र तीन वटा वैदेशिक प्रतिनिधि कार्यालयमार्फत सेवा दिइरहेको छ। बैंकले संयुक्त राज्य अमेरिका, संयुक्त अधिराज्य, क्यानडा, अष्ट्रेलिया, मलेसिया, दक्षिण कोरिया, जापान, साउदी अरब, कतार, यूएई, बहराइन, कुवेत, भारत र जोर्डन लगायतका मुलुकबाट रेमिट्यान्स सेवा सञ्चालन गर्दै आएको छ।

अन्तर्राष्ट्रिय स्तरमा ग्लोबल फाइनान्सको ‘बेष्ट बैंक अवार्ड’ (२०२४ र २०२५) तथा युरोमनीको ‘अवार्ड फर एक्सलेन्स २०२४’ सहितका उपाधि प्राप्त ग्लोबल आइएमई बैंक विभिन्न राष्ट्रिय तथा अन्तर्राष्ट्रिय संस्थाबाट पनि सम्मानित भएको छ।

सांग्रिला डेभलपमेन्ट बैंक हाल १०९ शाखा र ३० एटिएममार्फत देशभर सेवा दिइरहेको छ। बैंकका सीईओ श्रेष्ठले सहकार्यलाई ग्राहक हितका लागि सकारात्मक कदम भन्दै दीर्घकालीन साझेदारीमा विश्वास व्यक्त गरेका छन्।

यो समझौता निजी क्षेत्रका दुई बैंकबीचको सेवा विस्तारको उदाहरणका रूपमा हेरिएको छ, जसले देशभरका बैंकिङ प्रयोगकर्तालाई प्रत्यक्ष लाभ पुर्‍याउने अपेक्षा गरिएको छ।