काठमाडौंस्थित भारतीय राजदूतावासले शुक्रबार नेपालमा रहेका भारतीय समुदाय, भारतका मित्र तथा आमन्त्रित अतिथिहरूसँग ७९औं भारतीय स्वतन्त्रता दिवस मनाएको छ। राजदूतावास प्राङ्गणमा आयोजित कार्यक्रममा नेपालका लागि भारतीय राजदूतले राष्ट्रिय झण्डा आरोहण गर्दै औपचारिक उद्घाटन गरेका थिए।

त्यसपछि भारतकी राष्ट्रपति द्रौपदी मुर्मुले स्वतन्त्रता दिवसको पूर्वसन्ध्यामा राष्ट्रका नाममा गरेको सम्बोधन प्रसारण गरिएको थियो, जसमा उनले विगत ७८ वर्षमा भारतले हासिल गरेको विभिन्न क्षेत्रको प्रगतिबारे चर्चा गरेकी थिइन्।

 

सो अवसरमा भारतीय सशस्त्र बलका दिवंगत सदस्यका पत्नी र निकटतम नातेदारलाई सम्मान गर्दै राजदूतले कुल ६.४ करोड भारतीय रुपैयाँबराबरको आर्मी ग्रुप इन्स्योरेन्स फन्ड (AGIF) चेक हस्तान्तरण गरे। साथै, दूतावासले नेपालका सातै प्रदेश र २१ जिल्लामा रहेका ३९ शैक्षिक संस्था तथा पुस्तकालयलाई पुस्तक अनुदान दिने घोषणा गर्‍यो, जसले विशेषगरी दुर्गम क्षेत्रमा शैक्षिक सामग्रीको पहुँच विस्तारमा सहयोग गर्ने अपेक्षा गरिएको छ।

 

कार्यक्रममा भारतीय समुदायका सदस्य, नेपाली अतिथि, दूतावासका अधिकारी तथा उनीहरूका परिवारको सक्रिय सहभागिता रहेको थियो। सांस्कृतिक प्रस्तुतिमा दूतावासअन्तर्गतको स्वामी विवेकानन्द सांस्कृतिक केन्द्र र केन्द्रीय विद्यालय, काठमाडौंका विद्यार्थीहरूले देशभक्ति गीतमा आधारित कार्यक्रम प्रस्तुत गरेका थिए, जसले उत्सवलाई थप जीवन्त बनाएको थियो।