अस्ट्रेलियामा जारी टप एन्ड टी–२० सिरिजको दोस्रो खेलमा नेपालले बलियो चुनौतीको सामना गर्नुपर्ने भएको छ। डार्विनस्थित मरारा क्रिकेट मैदानमा शनिबार भएको खेलमा टस जितेर पहिले ब्याटिङ रोजेको बङ्गलादेश ‘ए’ ले निर्धारित २० ओभरमा ६ विकेटको क्षतिमा १८६ रन जोड्दै नेपाललाई जितका लागि १८७ रनको लक्ष्य दिएको हो।

बङ्गलादेशका ओपनर जिसम आलमले आक्रामक पारी खेल्दै ७३ रन बनाए भने अफिफ हुसेनले अविजित ४८ रनको योगदान गरे। त्यस्तै मोहम्मद नईमले २५ रन र सैफ हसनले ११ रन जोडे। बलिङतर्फ नेपालका रिजन ढकालले दुई विकेट लिन सफल भए। सन्दीप लामिछाने, करण केसी र नन्दन यादवले एक–एक विकेट हात पारे।

यसअघि सिरिजको पहिलो खेलमा नेपाल स्थानीय क्लब नर्दन टेरिटोरी स्ट्राइकरसँग ४२ रनले पराजित भएको थियो। सो क्रममा १७८ रनको लक्ष्य पछ्याउने क्रममा नेपाल निर्धारित २० ओभरमा आठ विकेट गुमाउँदै १३५ रनमै सीमित भएको थियो।

लगातार दोस्रो खेलमा पनि ठूलो लक्ष्य पछ्याउनुपर्ने स्थिति आएकोले नेपालको ब्याटिङ प्रदर्शनमाथि दबाब बढेको छ। अब नेपाली टोलीले पछिल्लो हारलाई प्रेरणामा बदल्दै सिरिजमा लय फिर्ता गर्ने या अझै संघर्ष जारी रहने भन्ने प्रश्नमा ध्यान केन्द्रित भएको छ।