नेपाल टेलिकमले आ।व। २०८१/८२ को चौथो त्रैमासिक वित्तीय विवरण सार्वजनिक गर्दै सञ्चालन आय र खुद मुनाफामा उल्लेखनीय गिरावट भएको जनाएको छ। कम्पनीका अनुसार सो अवधिसम्म कुल सञ्चालन आय ६८ अर्ब ६ करोड रुपैयाँमा सीमित भयो, जुन अघिल्लो आ।व। को सोही अवधिको तुलनामा ०.०८ प्रतिशतले कम हो।

कुल आयतर्फ पनि गिरावट देखिएको छ। गत आ।व। को तुलनामा यस आ।व। को चौथो त्रैमाससम्म कुल आय ८.०३ प्रतिशत घटेर ७३ अर्ब ६ करोड रुपैयाँमा पुगेको कम्पनीले जनाएको छ।

मुनाफा पक्षमा मिश्रित परिणाम देखिएको छ। सञ्चालनगत नाफा ६.८२ प्रतिशत बढेर १८ अर्ब ६ करोड रुपैयाँ पुगे पनि कर पूर्व मुनाफा ०.३० प्रतिशत घट्दै ११ अर्ब २१ करोड रुपैयाँमा सीमित भएको छ। सबैभन्दा ठूलो असर खुद मुनाफामा देखियो, जसमा ५७.२१ प्रतिशत कमी हुँदै २ अर्ब ६६ करोड रुपैयाँ मात्र नाफा भएको छ। अघिल्लो आ।व। को सोही अवधिमा खुद मुनाफा ६ अर्ब २३ करोड रुपैयाँ थियो। प्रतिशेयर आम्दानी (EPS) १४.८२ रुपैयाँमा खुम्चिएको विवरणमा उल्लेख छ।

राजस्व घट्नुका कारणहरूबारे टेलिकमले विभिन्न कारक औंल्याएको छ। अन्तर्राष्ट्रिय कलमा प्रयोग घट्नु, ओटीटी सेवाको विस्तार, प्रतिस्पर्धी कम्पनीहरूको प्रभाव, व्याजदर घटेकाले व्याज आम्दानीमा कमी, सेवाको दर कटौती र उच्च लागतमा दुर्गम क्षेत्रमा सेवा विस्तारजस्ता कारणले आयमा प्रतिकूल असर परेको कम्पनीको भनाइ छ। साथै, गत वर्ष अनुमतिपत्र नवीकरणका लागि २० अर्ब रुपैयाँ एकमुष्ठ भुक्तानी, कर्मचारीको निवृत्तिभरणको व्यवस्थाका लागि ठूलो रकम छुट्याउनु, लेखा मानकअनुसार स्थगन करको व्यवस्थापन, ऋण लगानी तथा अन्य सम्पत्तिमा नोक्सानी व्यवस्था बढाउनु पनि दबाबका कारण बनेका छन्।

कम्पनीले यस आ।व। मा देखिएको आय र नाफाको उतारचढावलाई चुनौतीका रुपमा स्वीकार गर्दै दीर्घकालीन सुदृढीकरणका लागि प्राविधिक, वित्तीय र संरचनागत सुधारमा निरन्तर ध्यान दिने प्रतिबद्धता जनाएको छ।

नेपालको प्रमुख दूरसञ्चार सेवा प्रदायकका रूपमा टेलिकमले बजारमा आफ्नै स्थान सुरक्षित राखे पनि बढ्दो प्रतिस्पर्धा र प्रविधि परिवर्तनका कारण यसले अझै रणनीतिक परिर्वतन आवश्यक भएको विश्लेषकहरूको बुझाइ छ।