ग्लोबल आइएमई बैंक लिमिटेडलाई अन्तर्राष्ट्रिय स्तरमा मान्यता प्राप्त युरो मनी अवार्ड फर एक्सलेन्स २०२५ अन्तर्गत ‘बेस्ट बैंक इन नेपाल’ अवार्ड प्रदान गरिएको छ। सन् १९९२ देखि विश्वव्यापी बैंकिङ क्षेत्रमा गहिरो विश्लेषण र मूल्यांकन गर्दै आएको युरो मनी म्यागजिन ले यो अवार्ड सञ्चालन गर्दै आएको हो।

 

 

बैंकका अनुसार, यो सम्मान ग्राहक सेवामा सुधार, वित्तीय स्थायित्व, प्राविधिक नवप्रवर्तन, सामाजिक उत्तरदायित्व, सुशासन तथा वातावरणीय क्षेत्रमा गरेको योगदानको आधारमा प्रदान गरिएको हो। विज्ञप्तिमा भनिएको छ, “ग्राहकलाई उत्कृष्ट सेवा, उच्चस्तरीय कार्यसम्पादन र सामाजिक उत्तरदायित्वप्रति प्रतिबद्धताका कारण ग्लोबल आइएमई बैंकले निरन्तर अन्तर्राष्ट्रिय मान्यता प्राप्त गर्दै आएको छ।”

यसअघि पनि बैंकले सन् २०२२ र २०२४ मा यही अवार्डअन्तर्गत बेस्ट बैंकको मान्यता पाइसकेको थियो। साथै, ग्लोबल फाइनान्स म्यागजिनबाट २०२४ र २०२५ मा नेपालकै उत्कृष्ट बैंकको अवार्ड प्राप्त गरेको तथ्य पनि बैंकले स्मरण गरेको छ।

हाल ग्लोबल आइएमई बैंक ७७ वटै जिल्लामा ३५२ शाखा, ३८४ एटिएम, १५५ शाखारहित बैंकिङ सेवा, ६८ एक्सटेन्सन काउन्टर र ३ विदेशी प्रतिनिधि कार्यालयमार्फत सेवा विस्तार गरेको छ। साथै, बैंकले अमेरिका, बेलायत, अष्ट्रेलिया, कोरिया, जापान, साउदी अरब, कतार, युएई लगायतका मुलुकबाट रेमिट्यान्स भित्र्याउँदै आएको छ।

बैंकका प्रतिनिधिहरूका अनुसार, अन्तर्राष्ट्रिय पुरस्कारले नेपालमा मात्र नभई विश्व बजारमा पनि आफ्नो साख मजबुत बनाउन मद्दत गर्ने अपेक्षा गरिएको छ।