एनआईसी एशिया बैंक लिमिटेडले आफ्नो बैंकिङ्ग सम्पत्ति, गैरबैंकिङ्ग सम्पत्ति र धितो सुरक्षणमा रहेको सम्पत्तिसमेतको लिलाम बिक्री प्रक्रियाबारे विस्तृत जानकारी दिने अनलाइन पोर्टल सार्वजनिक गरेको छ।

बैंकका अनुसार, पोर्टलमार्फत लिलाम बिक्रीमा राखिएका सम्पत्तिहरूको कित्ता नम्बर, क्षेत्रफल, फोटो, नक्सा र गुगल म्यापमार्फत स्थान पहिचानजस्ता विवरण सहजै प्राप्त गर्न सकिन्छ। यसले इच्छुक ग्राहकलाई सम्पत्ति हेरेपछि थप जानकारी लिन सीधै सोही पोर्टलमा रहेको म्यासेज बक्स प्रयोग गरी नाम, सम्पर्क नम्बर, इमेल र ठेगाना राखी सन्देश पठाउन सक्ने सुविधा दिएको छ।

एनआईसी एशिया बैंकले जारी गरेको विज्ञप्तिमा सहायक प्रमुख कार्यकारी अधिकृत तथा प्रमुख सूचना अधिकारी अर्जुन राज खनियाले भन्नुभएको छ, “ग्राहक महानुभावहरूले पोर्टलमार्फत सम्पत्तिको विस्तृत विवरण बुझेर लिलाम बिक्री प्रक्रियामा थप सहजता पाउने विश्वास लिएका छौं।”

बैंकले पोर्टलमा नियमितरूपमा बैंकिङ्ग तथा गैरबैंकिङ्ग सम्पत्ति, धितो सुरक्षणमा रहेका सम्पत्ति र लिलाम बिक्रीसम्बन्धी अन्य सूचनाहरू प्रकाशन गर्ने जनाएको छ। यसअघि लिलामसम्बन्धी जानकारी केवल सार्वजनिक सूचनामार्फत सीमित रहँदै आएकोमा डिजिटल पोर्टलको सुरुवातले पारदर्शिता र पहुँच दुवैलाई सहज बनाउने बैंकको दाबी छ।

यस प्रविधिमुखी प्रयासले ग्राहकलाई सम्पत्ति खरिद–बिक्रीमा आवश्यक जानकारी समयमै पाउन र लिलाम प्रक्रियामा सहभागिता सहज बनाउन मद्दत गर्ने अपेक्षा बैंकले गरेको छ।