आन्तरिक राजस्व कार्यालय भद्रपुरले चालु आर्थिक वर्ष २०८२/८३ को पहिलो महिनामा कुल ३० करोड ५१ लाख ९५ हजार रुपैयाँ राजस्व संकलन गरेको छ। कार्यालयका सूचना अधिकारी तथा कर अधिकृत डोरराज सुनुवारका अनुसार यो रकम चालु आवको वार्षिक लक्ष्यको ६.८५ प्रतिशत बराबर हो। चालु वर्षको वार्षिक लक्ष्य चार अर्ब ४५ करोड ५० लाख रुपैयाँ निर्धारण गरिएको छ।

साउन महिनामा कार्यालयले ३८ करोड तीन लाख ९१ हजार रुपैयाँ संकलन गर्ने लक्ष्य राखेकोमा ८०.२३ प्रतिशत मात्र वसूल हुन सकेको जनाइएको छ। संकलन भएको राजस्वमध्ये आयकरबाट सात करोड ८३ लाख ६२ हजार, ब्याज शीर्षकमा एक करोड ५१ लाख ६१ हजार, मूल्य अभिवृद्धि करबाट १४ करोड ४५ हजार, र अन्तःशुल्कतर्फ छ करोड ८३ लाख ७० हजार रुपैयाँ राजस्व उठेको विवरण प्राप्त भएको छ।

गत आर्थिक वर्ष २०८१/८२ को पहिलो महिनामा सोही कार्यालयले ३० करोड २३ लाख २६ हजार रुपैयाँ राजस्व संकलन गरेको थियो, जसको तुलनामा यस वर्षको पहिलो महिनामा करिब २८ लाख बढी राजस्व संकलन भएको देखिन्छ।

सुनुवारका अनुसार कार्यालयले लक्ष्य प्राप्तिका लागि बजार अनुगमन र निगरानीलाई निरन्तरता दिँदै आएको छ। साथै, करदातामुखी व्यवहारिक कर शिक्षा कार्यक्रमलाई पनि प्राथमिकताका साथ अगाडि बढाइएको छ।