नबिल बैंकलाई अन्तर्राष्ट्रियस्तरको प्रतिष्ठित मानिने ‘युरो मनी अवार्ड फर एक्सिलेन्स, २०२५ः बेस्ट बैंक फर सस्टेनेबल फाइनान्स’ सम्मान प्रदान गरिएको छ। यस अवार्डमार्फत बैंकको दिगो बैंकिङ अभ्यासलाई विशेष प्रशंसा गरिएको हो।

युरो मनी म्यागजिनले वार्षिक रूपमा विभिन्न बैंकहरूको कार्यक्रम, रणनीति र सेवाको विश्लेषण गर्ने गर्छ। त्यसकै आधारमा नबिल बैंकलाई दिगोपनासम्बन्धी कार्यसम्पादन, वातावरणीय र सामाजिक उत्तरदायित्वप्रतिको प्रतिबद्धता तथा सुशासन अभ्यासको मूल्याङ्कन गर्दै यस वर्षको सम्मान दिएको बैंकले जनाएको छ।

नबिलले विगत पाँच वर्षदेखि नेपाल सरकारका दिगो विकास लक्ष्य (एसडीजी)लाई आत्मसात गर्दै वातावरण संरक्षण, सामाजिक समावेशीकरण, मानव अधिकार र उत्तरदायी बैंकिङलाई आफ्नो रणनीतिक प्राथमिकतामा राख्दै आएको छ। बैंकका अनुसार कार्बन फुटप्रिन्ट घटाउने, वित्तीय साक्षरता अभिवृद्धि गर्ने र नवीनतम प्रविधि प्रयोगमार्फत सेवा विस्तार गर्ने पहलले पनि यस अवार्डमा महत्वपूर्ण भूमिका खेलेको छ।

यसअघि पनि नबिल बैंकले सन् २०१०, २०२०, २०२१, २०२२ र २०२४ मा युरो मनी अवार्ड फर एक्सिलेन्सका विभिन्न विधामा मान्यता प्राप्त गरिसकेको छ। यस वर्षको अवार्डलाई बैंकिङ क्षेत्रमा अन्तर्राष्ट्रिय स्तरमा विश्वसनीयता र मापदण्डको सूचकका रूपमा हेरिएको छ।

चार दशकभन्दा लामो इतिहास बोकेको नबिल बैंक हाल देशभर २६८ शाखा र ३२१ एटीएममार्फत करिब २५ लाखभन्दा बढी ग्राहकलाई सेवा प्रदान गर्दै आएको छ। नेपालको बैंकिङ विकासमा अग्रणी योगदान दिंदै आएको बैंकले यो अवार्डलाई आगामी दिनमा दिगो वित्तीय अभ्यासलाई अझ प्रभावकारी बनाउन प्रेरणा दिने अवसरका रूपमा लिएको बताएको छ।