सानिमा बैंक लिमिटेडले चिनियाँ बैंक चाइना डिभेलपमेन्ट बैंक (CDB) को एजेन्ट बैंकका रूपमा नियुक्ति पाएको छ। शुक्रबार चीनस्थित चोङ्किङ शाखामा आयोजित कार्यक्रममा भएको सम्झौताअनुसार सानिमा बैंकले नेपालका दुई ठूला जलबिद्युत परियोजनाका लागि वित्तीय सहजीकरण गर्ने जिम्मेवारी लिएको हो।

सम्झौताअनुसार सानिमा बैंकले १३५ मेगावाट क्षमताको मनाङ–मर्स्याङ्दी हाइड्रोपावर प्रा.लि. र १२० मेगावाट क्षमताको लाङटाङ–भोटेकोशी हाइड्रोपावर प्रा.लि. का लागि एजेन्ट बैंकको रूपमा काम गर्नेछ। यस कार्यले परियोजनामा विदेशी लगानी प्रवाह सहज बनाउने उद्देश्य राखिएको छ।

सम्झौतामा सानिमा बैंकका तर्फबाट प्रमुख निक्षेप अधिकृत हेमराज सञ्ज्याल र CDB चोङ्किङ शाखाका उपाध्यक्षले हस्ताक्षर गरेका थिए। कार्यक्रममा सानिमा बैंकका प्रमुख कार्यकारी अधिकृत (CEO) निश्चल राज पाण्डे, CDB चोङ्किङ शाखाका अध्यक्ष र अन्य लगानीकर्ताका प्रतिनिधिहरुको उपस्थिती थियो।

समारोहलाई सम्बोधन गर्दै सानिमा बैंकका CEO पाण्डेले अन्तर्राष्ट्रिय व्यापारिक सहकार्यको अवसर दिन CDB प्रति आभार व्यक्त गर्दै यस किसिमको सहकार्यले नेपालको ऊर्जा र पूर्वाधार विकासमा योगदान पुर्‍याउने अपेक्षा व्यक्त गरे। उहाँले भने, “यस्ता सहकार्यहरूले नेपालको जलबिद्युत, व्यापारिक पूर्वाधारलगायतका क्षेत्रमा महत्वपूर्ण टेवा पुर्‍याउनेछ।”

बैंकको भनाइअनुसार, यस सम्झौताले नेपालमै अहिलेसम्मको सबैभन्दा ठूलो परिमाणमा चिनियाँ मुद्राको अन्तरदेशीय कारोबारलाई सहज बनाएको छ। बैंकले यसलाई भविष्यमा अन्तर्राष्ट्रिय साख विस्तार गर्ने र राष्ट्रिय स्तरमा दिगो विकासमा योगदान गर्ने अवसरका रूपमा व्याख्या गरेको छ।

कार्यक्रममा सहभागी CDB र लगानीकर्ता कम्पनीका प्रतिनिधिहरुले परियोजनाहरू समयमै सम्पन्न गर्न सहजीकरण गर्ने प्रतिबद्धता पनि जनाएका थिए। उनीहरूले यी परियोजनाबाट प्राप्त अनुभवले आगामी दिनमा अन्य ठूला परियोजनामा समेत सहकार्यको बाटो खोल्ने विश्वास व्यक्त गरे।

यस सम्झौताले नेपाल–चीन वित्तीय सहकार्यलाई नयाँ उचाइमा पुर्‍याएको देखिन्छ, जसको सफलताले आगामी ऊर्जा तथा पूर्वाधार परियोजनाहरूमा अन्तर्राष्ट्रिय लगानीलाई थप आकर्षित गर्ने अपेक्षा गरिएको छ।