साविक विजेता लिभरपुलले इङ्लिस प्रिमियर लिगमा लगातार दोस्रो जित हात पारेको छ। सोमबार राति न्युक्यासल युनाइटेडविरुद्धको रोमाञ्चक खेलमा लिभरपुल ३–२ ले विजयी भयो।

एनफिल्डमा भएको सो खेलमा रायन ग्रेभेनबर्चले ३५औँ मिनेटमा पहिलो गोल गर्दै लिभरपुललाई अग्रता दिलाए। दोस्रो हाफ सुरु हुनासाथ ह्युगो एकिटिकेले ४६औँ मिनेटमा अन्तर दोब्बर पार्दा, इन्जुरी समयमा रियो एनगुमोहले निर्णायक तेस्रो गोल गरे।

न्युक्यासलले पनि हार मान्ने अवस्था देखाएन। ५७औँ मिनेटमा ब्रुनो गुइमेरेसले गोल गर्दै खेललाई प्रतिस्पर्धात्मक बनाए भने ८८औँ मिनेटमा विलियम ओसुलाले अर्को गोल फर्काए। तर, बराबरीको सम्भावना बनेको अवस्थामा अन्तिमतिर थपिएको गोलले न्युक्यासलको प्रयास विफल भयो।

खेलमा निर्णायक मोड पहिलो हाफको इन्जुरी समयमा आयो, जब न्युक्यासलका एन्टोन गोर्डन रातो कार्ड खाँदै मैदानबाट बाहिरिए। संख्यात्मक हिसाबले कमजोर बनेपछि उनीहरूले १० खेलाडीमै दोस्रो हाफ खेल्नुपर्‍यो, जसले जितको सम्भावना कमजोर बनायो।

यस जितसँगै लिभरपुलले प्रारम्भिक दुई खेलमै ६ अंक जोडेको छ। यता पराजित न्युक्यासलले समान खेलबाट मात्र १ अंक जोड्न सकेको छ। प्रतिस्पर्धात्मक लिग तालिकामा यो परिणामले लिभरपुललाई बलियो सुरुवात दिलाएको छ भने न्युक्यासलले आगामी खेलमा आफ्ना कमजोरी सच्याउनुपर्ने दबाब थपिएको छ।