अष्ट्रेलियामा जारी टी–२० अभ्यास श्रृंखलामा नेपालले लगातार दोस्रो जित हात पारेको छ। मङ्गलबार भएको दोस्रो खेलमा नेपालले क्यापिटल टेरिटोरी (एसिटी)लाई ६ विकेटले हरायो। यसअघि सोही दिन बिहान भएको पहिलो खेलमा पनि नेपाल विजयी भएको थियो।

दोस्रो खेलमा टस हारेर पहिले ब्याटिङ गरेको एसिटीले १७.२ ओभरमा सबै विकेट गुमाउँदै ९६ रन मात्रै जोड्यो। निक ब्रोएसले १६ रन बनाउँदा ज्याक केओघ, मिकी म्याकनमारा र टम होगनले समान १५–१५ रनको योगदान दिए। जेक स्मिथले १० रन जोडे। बलिङतर्फ नेपालका दीपेन्द्रसिंह ऐरी र शाहब आलमले ४–४ विकेट लिन सफल भए भने कप्तान रोहितकुमार पौडेल र गुलसन झाले एक–एक विकेट हात पारे।

९७ रनको साधारण लक्ष्य पछ्याउने क्रममा नेपालले १३.२ ओभरमै खेल जित्यो। ऐरीले ब्याटिङमा पनि चम्किँदै अविजित ४२ रन बनाए। उनको साथमा गुलसन झाले २३ रन जोडे भने आरिफ शेख ११ रनमा अविजित रहे। बलिङतर्फ एसिटीका इसाम रहमानले दुई विकेट लिए भने लुइस इभन्स र देव दुबेले एक–एक विकेट लिए।

यसअघि पहिलो अभ्यास खेलमा नेपालले १७७ रनको लक्ष्य दिएकाे थियो। सन्दीप लामिछानेले ह्याट्रिकसहित ५ विकेट लिँदा एसिटी १३६ रनमै समेटिँदै ४१ रनले पराजित भएको थियो।

टप एन्ड टी–२० सिरिजको समूह चरणबाट बाहिरिएको नेपालले विश्वकप तयारीलाई तीव्रता दिन स्थानीय टोलीसँग अभ्यास खेल खेलिरहेको हो। लगातार दुई जितले टोलीको आत्मविश्वास बढाएको छ, जसले आगामी अन्तर्राष्ट्रिय प्रतिस्पर्धामा राम्रो प्रदर्शन गर्ने सम्भावनालाई बल मिलाएको देखिन्छ।