साउथ अस्ट्रेलियासँगको अन्तिम एकदिवसीय अभ्यास खेलमा नेपालले कप्तान रोहित पौडेलको अविजित सतकको बलमा ऐतिहासिक जित दर्ता गरेको छ। शनिबार एडिलेडमा भएको खेलमा दुई सय ४३ रनको लक्ष्य पछ्याउँदै नेपालले ४४.१ ओभरमै आठ विकेटको क्षतिमा लक्ष्य पूरा गर्‍यो। कप्तान रोहितले १०२ बलमा नौ चौकासहित अविजित १०१ रन बनाउँदै इन्निङ्सको मेरुदण्ड बने, जबकि सोमपाल कामीले पनि ३८ अविजित रन जोडे।

यसअघि टस जितेर ब्याटिङ गरेको साउथ अस्ट्रेलियाले ४५ ओभरमा सबै विकेट गुमाउँदै २४२ रन जोडे। ह्यारी म्यानेन्तीले ६३ रन, दुवित हुगानबोजमले ५३, रायन किङले ३५ र म्याकेन्जी हार्भेले २४ रन बनाए। नेपालका बलरमध्ये नन्दन यादव र सोमपाल कामीले समान तीन विकेट हात पारे भने सन्दीप लामिछाने, शाहब आलम र रुपेश सिंहले एक–एक विकेट लिए।

नेपालको सुरुआत भने कमजोर रह्यो। ओपनर गुलशन झाले ३६ रन र कुशल भुर्तेलले २८ रन योगदान गरे पनि बीचको समयमा लगातार विकेट पतन भयो। तर कप्तान रोहित र अन्त्यतिर सोमपालको संयमित साझेदारीले नेपाललाई जितसम्म पुर्‍यायो। बलिङतर्फ साउथ अस्ट्रेलियाका मेन्जिजले चार विकेट र म्यानेन्तीले तीन विकेट झारे तर उनीहरूको प्रयास पर्याप्त भएन।

यसअघि नेपालले साउथ अस्ट्रेलियाविरुद्ध खेलिएका दुवै टी–२० अभ्यास खेलमा हार बेहोरेको थियो—पहिलो खेल तीन विकेटले र दोस्रो खेल तीन रनले। तर त्यसअघि क्यानबेरास्थित एसीटीविरुद्ध नेपालले दुवै टी–२० अभ्यास खेल जितेको थियो। टप एन्ड टी–२० सिरिज खेल्ने उद्देश्यले अष्ट्रेलिया पुगेको नेपाल ११ टोली सहभागी प्रतियोगितामा समूह चरणमै बाहिरिएको थियो।

आगामी अक्टोबरमा हुने आइसिसी टी–२० विश्वकप एसिया तथा इस्ट एसिया–प्यासिफिक छनोटको तयारीमा रहेको नेपाली टोलीका लागि यो जित आत्मविश्वास पुनःस्थापित गर्ने अवसर बनेको देखिन्छ। अब बाँकी तयारीलाई कसरी बलियो बनाउने भन्ने प्रश्न कप्तान र व्यवस्थापन दुवैका लागि चुनौतीका रूपमा रहनेछ।