युरोपेली फुटबलको सर्वोच्च प्रतियोगिता च्याम्पियन्स लिगको नयाँ सिजनको समूह चरणका खेलहरूको ड्र पछि उपाधि विजेता पेरिस सेन्ट जर्मेन (पिएसजी) कठिन यात्रामा निस्कनुपर्ने देखिएको छ। बिहीबार सम्पन्न ड्र अनुसार पिएसजीले जर्मनीको च्याम्पियन बायर्न म्युनिख र स्पेनी लिग विजेता बार्सिलोनासँगै युरोपा लिग विजेता टोटेनहामसँग पनि भिड्नुपर्ने छ। पिएसजी र टोटेनहाम दुई साताअघि मात्र सुपर कपमा आमनेसामने भएका थिए। यसबाहेक फ्रान्सेली क्लबले न्युक्यासल, एथलेटिको बिल्बाओ, बायर लिभरकुसेन, एट्लान्टा र पोर्चुगलको च्याम्पियन स्पोर्टिङ लिस्बनसँग पनि समूह चरणमै खेल्नेछ। गत वर्ष समूह चरणमा १५ औँ स्थानमा रहेर पनि उत्कृष्ट पुनरागमन गर्दै पिएसजीले उपाधि जितेको थियो।

यसपटकको ड्रले रियल म्याड्रिडलाई समेत सजिलो मार्ग दिएको छैन। १५ पटकको विजेता रियलले प्रिमियर लिगका दुई ठूला प्रतिद्वन्द्वी म्यान्चेस्टर सिटी र लिभरपुलसँग खेल्नेछ। गत वर्ष पनि यी दुई टिम समूह चरणमै भिडेका थिए, जहाँ लिभरपुलले घरेलु मैदानमा २–० ले जितेको थियो। यसपालि रियलले ६,४२० किलोमिटर टाढा काजकिस्तानको कैरात अल्माटीसम्म यात्रा गर्नुपर्नेछ, जुन च्याम्पियन्स लिग इतिहासकै सबैभन्दा लामो यात्रामध्ये पर्छ। साथै, रियलले इटालीको युभेन्ट्ससँग पनि खेल्नेछ, जसलाई सन् २०१७ को फाइनलको पुनरावृत्ति मानिएको छ। अन्य प्रतिद्वन्द्वीमा मोनाको, मार्से, इन्टर मिलान, आइनट्राक्ट फ्रान्कफर्ट र गालाटसारे पनि रहेका छन्।

यो दोस्रो संस्करण हो जहाँ लिग चरणमा ३६ टोली एकै संरचनामा प्रतिस्पर्धा गर्नेछन्। प्रत्येक टिमले आठ फरक प्रतिद्वन्द्वीविरुद्ध खेल्नेछ। शीर्ष आठ टोली सिधै अन्तिम १६ मा प्रवेश गर्नेछन् भने ९ देखि २४ स्थानसम्मका टोलीले प्लेअफ खेल्नुपर्नेछ। पुछारका १२ टोली भने समूह चरणमै बाहिरिनेछन्। खेलहरू सेप्टेम्बर १६ बाट सुरु भएर जनवरी २८ मा समाप्त हुनेछन्। यसपटक बोडो–ग्लिम्थट, कैरात अल्माटी, पाफोस र बेल्जियमको युनियन सेन्ट गिलोइसीले पहिलोपटक च्याम्पियन्स लिगमा स्थान बनाएका छन्।

पुरस्कार राशिमा पनि युएएफएले ठुलो रकम छुट्याएको छ। कुल २.८८ अर्ब डलर बाँडफाँट हुने यस सिजनमा सबैभन्दा कमजोर मानिएको कैरातले पनि कम्तीमा २३ मिलियन डलर सुनिश्चित गरेको छ। शीर्ष वरीयताका पिएसजी र रियल म्याड्रिडले कम्तीमा ६९ मिलियन डलर प्राप्त गर्नेछन्। जित र बराबरीमा थप कमाइ हुने यो संरचनामा अन्तिम विजेताले १७५ मिलियन डलर हात पार्नेछ।

प्रतिस्पर्धात्मक ड्रले यसपटकको च्याम्पियन्स लिग अझै रोमाञ्चक बन्ने संकेत गरेको छ, जहाँ ऐतिहासिक प्रतिद्वन्द्विता र नयाँ क्लबहरूको प्रवेशले फुटबलप्रेमीलाई बहुप्रतिक्षित क्षणहरू दिने अपेक्षा गरिएको छ।