गरिमा विकास बैंक लिमिटेडले भारतीय चेम्बर अफ कमर्सद्वारा आयोजित ‘इमर्जिङ एशिया बैंकिङ कन्क्लेव एण्ड अवार्ड्स’बाट सम्मान प्राप्त गरेको छ । अगस्ट २९, २०२५ मा नयाँ दिल्लीमा सम्पन्न तेस्रो संस्करणको कार्यक्रममा बैंकलाई ‘डेभलपमेन्ट बैंकिङ’ र ‘फाइनान्सियल इन्क्लुजन’ दुवै विधामा उत्कृष्ट ठहर गर्दै अवार्ड प्रदान गरिएको हो ।

यो अवार्डका लागि नेपाल, भारत, बंगलादेश, म्यानमार र श्रीलंकाका विभिन्न बैंक तथा वित्तीय संस्थाहरुको सहभागिता रहेको थियो । कार्यक्रममा गरिमा विकास बैंकका प्रमुख कार्यकारी अधिकृत माधव प्रसाद उपाध्याय र नायब प्रमुख कार्यकारी अधिकृत अनिल रेग्मीले संयुक्त रुपमा सम्मान ग्रहण गर्नुभयो ।

यसअघि पनि बैंकले सन् २०२४ मा यही अवार्डको दोस्रो संस्करणमा ‘फाइनान्सियल इन्क्लुजन’ विधामा अवार्ड प्राप्त गरेको थियो । यस वर्ष दोहोरो विधामा मान्यता प्राप्त गर्नु बैंकको संस्थागत क्षमता र क्षेत्रीय प्रतिस्पर्धामा देखिएको सक्रियतालाई पुष्टि गर्ने संकेतका रुपमा हेरिएको छ ।

बैंकले यस अवसरमा ग्राहक, नियमनकारी निकाय, शेयरधनी र शुभचिन्तकप्रति आभार व्यक्त गर्दै अवार्डले अझै गुणस्तरीय, सुरक्षित र सहज सेवा विस्तार गर्ने प्रतिबद्धता मजबुत बनाएको बताएको छ । गरिमा विकास बैंकका अनुसार हाल देशभर १२५ शाखा, १ एक्स्टेन्सन काउन्टर र ५१ एटिएममार्फत सेवा प्रदान भइरहेको छ भने डिजिटल बैंकिङमार्फत पहुँच अझ विस्तार गरिएको छ ।

यसरी दक्षिण एशियाली स्तरमा प्राप्त अवार्डले नेपालका विकास बैंकहरूको भूमिकाबारे क्षेत्रीय वित्तीय बजारमा थप पहिचान दिलाएको देखिन्छ ।