बागमती प्रदेशका मुख्यमन्त्री बहादुर सिंह लामा तामाङले आइतबार पदबाट राजीनामा दिएका छन्। हेटौँडामा आयोजना गरिएको पत्रकार सम्मेलनमार्फत लामाले आफ्नो राजीनामा सार्वजनिक गरे।

नेपाली कांग्रेसका तर्फबाट गठबन्धन सरकारको नेतृत्व गर्दै साउन ८, २०८० मा नियुक्त भएका लामाले साउन ९ मा पदभार ग्रहण गरेका थिए। ३७४ दिनको कार्यकालपछि उनले राजीनामा दिएका हुन्।

पत्रकार सम्मेलनमा लामाले शक्ति केन्द्र र स्वार्थ समूहको इशारामा चल्न नसकेको कारण राजीनामा दिनुपर्ने अवस्था आएको बताएका छन्। संविधानतः आफू अझै मुख्यमन्त्री पदमा सुरक्षित रहेको दाबी गर्दै उनले भने, “पार्टी सभापति शेरबहादुर देउवाको आग्रहमा, इमानदार सिपाहीको नाताले, आज पद त्याग गरेको हुँ।” लामाले आफ्नो कार्यकालमा बागमती प्रदेशमा सुशासन र प्रणाली निर्माणमा उल्लेख्य सफलता मिलेको दाबीसमेत गरे।

हालै सम्पन्न कांग्रेस बागमती प्रदेश संसदीय दलको नेताको चुनावमा लामा इन्द्रबहादुर बानियाँसँग पराजित भएका थिए। यसपछि पार्टी भित्रबाटै लामामाथि राजीनामाको दबाब बढ्दै गएको थियो। संविधानको धारा १६८(२) अनुसार दुई वा दुईभन्दा बढी दलको समर्थन प्राप्त व्यक्ति मुख्यमन्त्री बन्ने व्यवस्थाले लामालाई अझै सुरक्षित बनाउँथ्यो। तर दलको नेताबाट हटिएपछि नैतिकताको प्रश्न उठाउँदै बानियाँले मार्ग प्रशस्त गर्न माग गरेका थिए। 

लामाको राजीनापछि अब बागमती प्रदेशमा नयाँ सरकारको नेतृत्व कसले लिने भन्नेमा चासो बढेको छ। दलभित्रको शक्ति सन्तुलन र अन्य गठबन्धनको समीकरण हेर्दा इन्द्रबहादुर बानियाँ नै सम्भावित मुख्यमन्त्री उम्मेदवारको रूपमा देखा परेका छन्। यस घटनाले नेपाली कांग्रेसभित्रको आन्तरिक शक्ति संघर्ष र नेतृत्वको स्पष्टता अभावसमेत झल्काएको छ।