ताप्लेजुङस्थित काबेली खोलाबाट उत्पादन भएको करिब २२ मेगावाट विद्युत मंगलबारदेखि राष्ट्रिय प्रसारण प्रणालीमा समाहित भएको छ।

सिरिजङ्गा गाउँपालिका–५, ६ र ७ हुँदै बग्ने काबेली खोलामा निर्माण गरिएको काबेली–३ क्यास्केड जलविद्युत आयोजना सम्पन्न भई उत्पादित २१.९३ मेगावाट विद्युत राष्ट्रव्यापी प्रसारण लाइनमा जोडिएको हो। काबेली हाइड्रोपावर कम्पनी लिमिटेडको प्रवर्द्धनमा निर्माण भएको उक्त आयोजना २०७९ माघ ५ गतेदेखि सुरु गरिएको थियो।

आयोजनाबाट उत्पादित विद्युत पाँचथरको हिलिहाङ गाउँपालिका–१ अमरपुर दुबिचौरमा रहेको नेपाल विद्युत प्राधिकरणको १३२ केभी क्षमताको सवस्टेसनमार्फत राष्ट्रिय ग्रिडमा जोडिएको जनसम्पर्क अधिकृत मेघनाथ ढुङ्गानाले जानकारी दिए।

उनका अनुसार आयोजनाको मुख्य सुरुङ (हेडरेस टनेल) ५ हजार १ सय ४०.२ मिटर लामो छ। विद्युतगृह सिरिजङ्गा–५ पेदाङस्थित खोलाखेतमा निर्माण गरिएको छ भने इन्टेक सिरिजङ्गा–७ खेवाङस्थित ओथाममा राखिएको छ। आयोजनामा पानी थिगार्ने अडिटहरु पनि रहेका छन् — सिरिजङ्गा–५ पेदाङस्थित भाङटारमा रहेको अडिट नं. १ को लम्बाइ २१६ मिटर छ भने सिरिजङ्गा–७ सिबुवादिनमा रहेको अडिट नं. २ को लम्बाइ ३९६ मिटर रहेको छ।

यो आयोजनाको कुल लागत ४ अर्ब २८ करोड ५० लाख रुपैयाँ रहेको जनाइएको छ। लगानी संरचनाअनुसार २५ प्रतिशत स्वपुँजी तथा बाँकी ७५ प्रतिशत ऋण रहेको छ। ऋण एनएमबि बैंक लिमिटेडको नेतृत्वमा प्रभु बैंक लिमिटेड र नविल बैंक लिमिटेडबाट प्राप्त गरिएको हो।