राष्ट्रपति पौडेलको भनाइ: "खेलाडीको भविष्य खेलमै सुरक्षित हुनुपर्छ"
राष्ट्रपति रामचन्द्र पौडेलले सरकारलाई खेलाडीहरूको भविष्य खेल क्षेत्रमै सुरक्षित गर्ने गरी विशेष नीति र सुविधा ल्याउन आग्रह गर्नुभएको छ ।
भारतमा आयोजित म्याट्रिक्स फाइटर नाइट टाइटल जितेका नेपाली एमएमए फाइटर रविन्द्र ढाटलाई शीतल निवासमा सम्मान गर्दै राष्ट्रपति पौडेलले खेल क्षेत्रबाट देश अन्तर्राष्ट्रिय स्तरमा चिनिने भएकाले खेलाडीको सम्मान र खेल क्षेत्रको विकासप्रति गम्भीर हुनुपर्ने धारणा राख्नुभयो ।
"देश–विदेशका प्रतियोगितामा सहभागी हुन र प्रशिक्षणका अवसर प्रदान गर्दै खेलाडीलाई आवश्यक सुविधा र सम्मान दिइनुपर्छ," उहाँले भन्नुभयो, "त्यसैबाट मात्रै खेलाडीले विश्वस्तरीय सफलता र कीर्तिमान कायम गर्न सक्छन् ।"
राष्ट्रपति पौडेलले खेललाई शारीरिक, मानसिक र समग्र व्यक्तित्व विकासको आधार बताए । उहाँले सरकार र खेलसँग सम्बन्धित निकायहरूले अझ प्रभावकारी रूपमा काम गर्नुपर्नेमा जोड दिनुभयो ।
बझाङका ‘बाघ’ भनेर परिचित रविन्द्र ढाटको उपलब्धि नेपालीको गौरव भएको राष्ट्रपति पौडेलको भनाइ थियो । "उनले देखाएको खेल कौशल, शक्ति र समर्पण प्रेरणादायक छ," उहाँले भन्नुभयो, "यो सफलताका लागि साथ र सहयोग गर्ने सबैलाई म धन्यवाद दिन चाहन्छु ।"
