तनहुँको ऋषिङ गाउँपालिका–१ मा निर्माणाधीन १४० मेगावाट क्षमताको तनहुँ जलविद्युत् आयोजनाअन्तर्गत मुख्य बाँध निर्माण कार्यले गति लिएको छ । हालसम्म ७३ हजार घनमिटर कङ्क्रिट निर्माण कार्य सम्पन्न भइसकेको आयोजनाले जनाएको छ।

करिब ९ लाख घनमिटर कङ्क्रिट प्रयोग गरी १४० मिटर अग्लो बाँध निर्माण गर्ने लक्ष्य रहेको छ। २०७८ भदौ १४ गतेदेखि सुरु गरिएको बाँध निर्माण हालसम्म ४३.५ प्रतिशत प्रगतिमा पुगेको छ।

आयोजनाका प्रमुख श्यामजी भण्डारीका अनुसार, २०८१ चैत ७ गतेदेखि बाँधका लागि कङ्क्रिट निर्माण सुरु गरिएको हो। हालसम्म औसत १० मिटर उचाइसम्म कङ्क्रिटका ब्लकहरू निर्माण भइसकेका छन्। उहाँले उच्च बाँधमा प्रयोग हुने कङ्क्रिटको तापमान नियन्त्रण अति संवेदनशील हुने भएकाले विशेष सावधानी अपनाइएको जानकारी दिनुभयो।

 बाँध निर्माणका लागि सेती नदीको प्रवाहलाई मोडेर काम अघि बढाइएको छ। व्यास नगरपालिका–५ र ऋषिङ गाउँपालिका–१ को सिमानामा पर्ने बाँध स्थलभन्दा माथिल्लो भागमा ६२६.९२ मिटर लामो सुरुङ निर्माण गरी नदी डाइभर्सन गरिएको हो।

भण्डारीले भन्नुभयो, “डाइभर्सन सुरुङमार्फत पानीलाई बाँधस्थलबाट तल्लो तटीय क्षेत्रमा पुनः फर्काएर निर्माण कार्य अघि बढाइएको हो । यो कार्य बाँध निर्माणको महत्त्वपूर्ण चरण हो।”

 आयोजनाको प्याकेज-२ अन्तर्गत भूमिगत विद्युत्गृहको संरचना निर्माण सकिएको र हाल उपकरण जडानको काम भइरहेको छ। यस खण्डमा ६७ प्रतिशत प्रगति भएको छ।

यस्तै, प्याकेज-३ अन्तर्गत प्रसारणलाइन निर्माणमा ७४ प्रतिशत प्रगति भएको जानकारी भण्डारीले दिनुभयो। आयोजनाको समग्र निर्माण कार्य २०८३ सालको असारसम्म सम्पन्न गर्ने लक्ष्य राखिएको छ। कुल लागत ५० करोड ५० लाख अमेरिकी डलर अनुमान गरिएको छ, जसमा प्रसारणलाइन, ग्रामीण विद्युतीकरण र निर्माण अवधिको व्याज समेत समावेश छ।

वित्तीय व्यवस्थापन यस प्रकार गरिएको छ: एशियाली विकास बैंक (ADB): १५ करोड डलर,जापान अन्तरराष्ट्रिय सहयोग नियोग (JICA): १८ करोड ४० लाख डलर,युरोपियन लगानी बैंक (EIB): आठ करोड ५० लाख डलर,नेपाल सरकार / नेपाल विद्युत् प्राधिकरण: आठ करोड ६० लाख डलर यो आयोजना ऊर्जा स्वावलम्बन र आपूर्ति स्थायित्वतर्फको महत्त्वपूर्ण पाइला मानिएको छ।