उपप्रधानमन्त्री तथा अर्थमन्त्री विष्णुप्रसाद पौडेलले आर्थिक वर्ष २०८२/८३ को बजेट कार्यान्वयन प्रभावकारी बनाउन वार्षिक योजना र स्पष्ट समयतालिका निर्माण गर्न निर्देशन दिनुभएको छ।

बिहीबार अर्थ मन्त्रालयमा आयोजित बैठकमा उहाँले सम्बन्धित सचिवहरूलाई सम्बोधन गर्दै बजेट कार्यान्वयनको प्रक्रिया समयमा अघि बढाउनुपर्ने आवश्यकता औंल्याउनुभयो। “सही समयमा सही कदम चाल्न सके मात्रै बजेटको अपेक्षित प्रभाव देखिन्छ,” अर्थमन्त्री पौडेलले भन्नुभयो, “अर्थ मन्त्रालय कार्यान्वयनमा आवश्यक सबै प्रकारको सहयोग गर्न तयार छ।”

 अर्थमन्त्री पौडेलले विद्यमान कानुनको दायराभित्र रही गैरकर राजस्व (non-tax revenue) स्रोतको अधिकतम उपयोग गर्नुपर्नेमा विशेष ध्यान दिन आग्रह गर्नुभयो। उहाँले नयाँ स्रोतको पहिचान गर्दै दिगो तथा विश्वसनीय आयको खोजी गर्न निर्देशन दिनुभयो।

अर्थ मन्त्रालयका अनुसार आर्थिक वर्ष २०८१/८२ मा एक खर्ब २८ अर्ब रुपैयाँ गैरकर राजस्व संकलन भएको थियो, जुन कूल राजस्वको १०.९ प्रतिशत हिस्सा हो।

बैठकमा गैरकर राजस्व वृद्धिका सम्भावित उपायहरू, कानुनी र नीतिगत सुधार, र बजेट कार्यान्वयनको चरणबद्ध अनुगमनबारे गहिरो छलफल भएको थियो। बैठकमा अर्थ सचिव, राजस्व सचिव, मन्त्रालयका अन्य उच्च अधिकारीहरू सहभागी थिए।