भुटानको थिम्पुस्थित चामलिमिथाङ रंगशालामा आज भएको एएफसी महिला यू–२० एसियन कप छनोटअन्तर्गत समूह ‘ए’को दोस्रो खेलमा नेपालले साउदी अरबलाई १–० गोलले हराउँदै पहिलो जित हात पारेको छ।

नेपालका लागि निर्णायक गोल अतिरिक्त समयमा सुक्रिया मियाँले गरिन्। खेलको दोस्रो हाफको इन्जुरी टाइमको पहिलो मिनेटमा उनले गोल गर्दै नेपाललाई तीन अङ्क दिलाइन्।

यसअघि पहिलो खेलमा नेपाल घरेलु टोली भुटानसँग १–१ को बराबरीमा रोकिएको थियो। यो जितसँगै नेपालले दुई खेलमा चार अङ्क जोड्दै आगामी वर्ष थाइल्याण्डमा हुने मुख्य प्रतियोगितामा पुग्ने सम्भावना जिउँदो राखेको छ।

साउदी अरब भने लगातार दुई खेलमा हार भोगेपछि एक खेल बाँकी छँदै प्रतियोगिताबाट बाहिरिएको छ। अब नेपालले आइतबार निर्णायक खेलमा उत्तर कोरियासँग भिड्नेछ।