युवा तथा खेलकुदमन्त्री तेजुलाल चौधरीले खेलकुदलाई पर्यटक भित्र्याउने प्रमुख माध्यमका रूपमा विकास गर्ने सरकारको योजना रहेको बताएका छन्। शुक्रबार काँकडभिट्टा खेलमैदानको निरीक्षण गर्दै मन्त्री चौधरीले पूर्वी नाकामा रहेको यस मैदानलाई क्रियाशील बनाइए पर्यटक भित्र्याउन सकिने उल्लेख गरे।

“दुई ठूला देशको बीचमा छौँ हामी। एसियाली राजमार्ग निर्माणपछि यसको अन्तर्राष्ट्रिय महत्व अझ बढ्नेछ,” उनले भने। चालू आर्थिक वर्ष २०८२/८३ मा काँकडभिट्टा खेलमैदान स्तरोन्नतिको लागि संघीय सरकारले तीन करोड रुपैयाँ विनियोजन गरेको जानकारी दिँदै मन्त्री चौधरीले क्रिकेट, फुटबल, भलिबल जस्ता खेलबाट नेपाली खेलाडीले लाखौँ आर्जन गरेको उदाहरण प्रस्तुत गरे।

उनले खेलकुदलाई मनोरञ्जन, स्वास्थ्य र पर्यटनको माध्यमका रूपमा विकास गर्न सकिने बताउँदै, “काँकडभिट्टाले उत्पादन गरेका खेलाडीले देशको पहिचान बढाउन अतुलनीय योगदान दिएका छन्,” भने। सरकारले यस वर्ष खेलकुदका लागि कुल छ अर्ब रुपैयाँ छुट्याएको उल्लेख गर्दै उनले खेलमैदानहरू स्थानीय तह र प्रदेशलाई हस्तान्तरण गर्ने तयारी भइरहेको बताए। काँकडभिट्टा खेलमैदान रहेको जमिन ग्रामीण आवास कम्पनीको स्वामित्वमा भएकाले छिट्टै स्थानीय तहको नाममा ल्याउनुपर्नेमा उनले जोड दिए।

“जग्गाको स्वामित्व पालिकामा ल्याएर पूर्वाधार विकासमा सहयोग गर्न सरकार तयार छ,” उनले स्पष्ट पारे। सो अवसरमा मेचीनगर नगरप्रमुख गोपाल बुढाथोकी, उपप्रमुख मीना उप्रेती, पूर्वनगरप्रमुख विमल आचार्यलगायतले मैदानका समस्या र खेलकुद गतिविधि विस्तारबारे मन्त्री चौधरीको ध्यानाकर्षण गराए।

मन्त्री चौधरी शुक्रबार नै मेचीनगरको चारआलीमा आयोजना हुने इन्डो–नेपाल इन्टरस्कुल कराते प्रतियोगिताको उद्घाटन गर्ने कार्यक्रम छ।