राष्ट्रपति रामचन्द्र पौडेलले शुक्रबार साँझ पूर्व प्रधानन्यायाधीश सुशीला कार्कीलाई अन्तरिम सरकारको प्रधानमन्त्रीमा नियुक्त गर्नुभएको छ। राष्ट्रपति कार्यालयका सल्लाहकार किरण पोखरेलका अनुसार उहाँको शपथग्रहण समारोह राति ९ बजे राष्ट्रपति भवन शीतल निवासमा तय भएको छ।

शपथ ग्रहणपछि कार्कीले सानो आकारको मन्त्रिपरिषद् गठन गर्ने र पहिलो बैठक सिंहदरबारस्थित नयाँ गृहमन्त्रालय भवनमै बस्ने तयारी गरिएको स्रोतले जनाएको छ। राष्ट्रपति र नवनियुक्त प्रधानमन्त्रीबीच भएको सहमतिअनुसार मन्त्रिपरिषद्को पहिलो निर्णय प्रतिनिधिसभा विघटनको सिफारिस गर्ने रहेको छ। सो सिफारिसलाई राष्ट्रपतिले अनुमोदन गरेपछि संसद विघटन हुने र त्यसपछि अन्तरिम सरकारले आगामी निर्वाचनको मिति तोक्ने प्रक्रिया अघि बढ्ने छ।

प्रधानमन्त्री पद खाली हुने अवस्था भदौ २३ र २४ गते देशभर भड्किएको ‘जेनजी’ आन्दोलनपछि बनेको हो। आन्दोलन उग्रिँदै जाँदा तत्कालीन प्रधानमन्त्री केपी शर्मा ओलीले पदबाट राजीनामा दिएका थिए। त्यसबेला संघीय संसद भवन, सिंहदरबार, राष्ट्रपति कार्यालय, सर्वोच्च अदालतदेखि शीर्ष नेताहरू र केही व्यापारीका आवाससमेत आक्रोशित समूहको निशानामा परेका थिए।

जेनजी आन्दोलनकारीहरूले अघि सारेको प्रस्तावअनुसार नै राष्ट्रपति पौडेलले पूर्व प्रधानन्यायाधीश कार्कीलाई अन्तरिम सरकारको नेतृत्व दिनुभएको हो। राजनीतिक व्यवस्थाप्रति अविश्वास र असन्तोषले उचालिएको आन्दोलनको चपेटामा मुलुक परेको वर्तमान अवस्थामा नयाँ प्रधानमन्त्रीको नेतृत्व मुलुकलाई स्थायित्वतर्फ डोर्‍याउने वा अर्को विवादको द्वार खोल्ने भन्ने प्रश्न अबको प्रमुख विमर्श बन्ने देखिएको छ।