शनिबारदेखि मुलुकभर सार्वजनिक यातायात फेरि सञ्चालनमा आएको छ। मंगलबारदेखि सुरु भएको ‘जेनजी’ आन्दोलनका कारण उपत्यकासहित देशका विभिन्न भागमा यातायात पूर्ण रूपमा ठप्प भएको थियो। आन्दोलन तीव्र बन्दै गएपछि यात्रु, व्यवसाय र दैनिक जीवन दुवै प्रभावित भएका थिए।

नेपाल यातायात व्यवसायी राष्ट्रिय महासङ्घका वरिष्ठ उपाध्यक्ष सरोज सिटौलाका अनुसार अहिलेको अवस्थामा केन्द्रबाट औपचारिक निर्णय लिन सकिने स्थिति नभएकाले स्थानीय तह र प्रशासनसँगको सहकार्यमा यातायात पुनः सञ्चालनमा ल्याइएको हो। सिटौलाले भने, “स्थानीय प्रशासनसँग समन्वय गरेर चलाउन हामीले आग्रह गरेका छौँ।”

उनका अनुसार शनिबारदेखि लामो दूरी र छोटो दूरीका सबै प्रकारका सवारीसाधन सञ्चालनमा आएका छन्। यसअघि आन्दोलनका कारण यात्रुहरू बाटोमै अलपत्र पर्ने, कर्मचारी कार्यालय पुग्न नसक्ने र आवश्यक सेवासुविधा समेत प्रभावित भएको अवस्था देखिएको थियो।

यातायात खुल्न थालेसँगै दैनिक जीवन सामान्यतर्फ फर्किन थालेको देखिए पनि आन्दोलनपछिको राजनीतिक र सामाजिक व्यवस्थापन अझै चुनौतीपूर्ण रहने संकेत  छ।