नागरिक उन्मुक्ति पार्टीका संरक्षक रेशमलाल चौधरीले पार्टीसँगको सम्बन्ध अन्त्य गरेको घोषणा गर्नुभएको छ। उहाँले शनिबार सामाजिक सञ्जालमार्फत सार्वजनिक वक्तव्य जारी गर्दै व्यक्तिगत अहङ्कार र स्वेच्छालाई जित्न नसकिएको कारण पार्टीबाट अलग भएको जानकारी दिनुभयो।

चौधरीले लेख्नुभयो, “मैले नागरिक उन्मुक्ति पार्टीको गीत, विधान र विचार स्थापना गरेको हुँ । तर व्यक्तिगत अहङ्कार र स्वेच्छालाई जित्न सकेन।” उहाँले पार्टी अध्यक्ष रञ्जिता श्रेष्ठ तथा नेता दामोदर पण्डितसँग कुनै वैरभाव नभएको तर आन्तरिक फटाहाहरूका कारण व्यक्तिगत रूपमा अल्झिनुभन्दा अलग मार्ग रोजेको स्पष्ट पार्नुभयो।

पछिल्ला दिनमा देखिएका आन्तरिक विवादप्रति उल्लेख गर्दै चौधरीले आफूले त्यस्ता कुरा सम्झन पनि नचाहेको बताए। जेलमा हुँदा समेत निदाउन पाएको तर बाहिर पार्टी विवादका कारण अनिद्रा बढेको अनुभव उहाँले साझा गर्नुभयो।

राजनीतिक जीवन पार्टीविहीन सम्भव नभएको भन्दै चौधरीले नयाँ दल र संगठन निर्माणमा लाग्ने घोषणा गर्नुभयो। उहाँले नागरिक उन्मुक्ति पार्टी नेपाल नामक नयाँ राजनीतिक संगठन बनाउने तयारी रहेको र त्यसको चुनाव चिह्न ‘पहिचान’ नै रहने उल्लेख गर्नुभयो। “मलाई ठग होइन, मेरो आन्दोलन र पहिचान बुझ्ने कार्यकर्ता चाहिन्छ,” चौधरीको भनाइ छ।

टीकापुर घटनामा दोषी ठहर भई जेलमा रहेका बेला २०७८ मा चौधरीकै नेतृत्वमा नागरिक उन्मुक्ति पार्टी गठन भएको थियो। स्थापनाको छोटो अवधिमै सो पार्टीले प्रतिनिधि सभा, प्रदेश सभा र स्थानीय तहमा उल्लेखनीय सफलता हासिल गरेको थियो। आजको घोषणाले उक्त यात्रामा नयाँ मोड आएको छ, जसले थारू समुदायसहितको समग्र राजनीतिमा फेरि एकपटक तरंग ल्याउने देखिन्छ।