कास्की कारागारबाट जेनजी आन्दोलनको अव्यवस्थाबीच भागेका ३० जना कैदीबन्दीलाई तनहुँ प्रहरीले नियन्त्रणमा लिएको छ। आन्दोलनकै दिन सुरक्षा शिथिल भएको मौका छोपेर उनीहरू फरार भएका थिए।

जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक अशोक थापाका अनुसार विभिन्न नाकाबन्दी, आकस्मिक चेकजाँच र सूचनामार्फत ती कैदीलाई पक्राउ गरिएको हो। “सुरक्षाको चुनौतीबीच पनि हाम्रो टोलीले रातदिन खटेर कैदीहरूलाई नियन्त्रणमा लिन सफल भएको छ,” थापाले बताए। उनका अनुसार पक्राउ परेकामध्ये केही कैदी स्थानीय क्षेत्रमा लुकिरहेका थिए भने केही अन्य जिल्लातर्फ भाग्ने क्रममा पक्रिएका हुन्।

सशस्त्र प्रहरी, स्थानीय प्रहरी चौकी र सूचनादाताको सहयोगमा गरिएको अपरेसनलाई सफलताका रूपमा प्रस्तुत गरिएको छ। थापाले चेतावनी दिंदै भने, “सार्वजनिक सुरक्षालाई खतरामा पार्ने, कानुनको शासनलाई चुनौती दिने गतिविधि कतै सह्य हुँदैन।”

प्रहरीका अनुसार नियन्त्रणमा परेकालाई कानुनी प्रक्रियामार्फत पुनः कारागार पठाइनेछ। अझै केही कैदी फरार रहेको प्रारम्भिक अनुमान भए पनि ठूलो सङ्ख्यामा नियन्त्रणमा लिनु सुरक्षाप्रणालीका लागि महत्वपूर्ण उपलब्धि भएको प्रहरीको धारणा छ।

जेनजी आन्दोलनका कारण विभिन्न जिल्लामा फैलिएको अस्थिरता र हिंसात्मक गतिविधिले सुरक्षा निकायलाई थप सतर्क बनाएको छ। प्रहरी नेतृत्वले बाँकी कैदी पक्राउ नपर्दासम्म अपरेसनलाई निरन्तरता दिने र कुनै हालतमा उम्कन नदिने अडान लिएको छ।