दुबई अन्तर्राष्ट्रिय रंगशालामा आइतबार राति सम्पन्न एसिसी टी–२० एसिया कपको खेलमा भारतले पाकिस्तानलाई सात विकेटले पराजित गर्दै सहज जित हात पारेको छ। पाकिस्तानले दिएको १२८ रनको लक्ष्य भारतले १५.५ ओभरमै तीन विकेट गुमाएर पूरा गर्‍यो।

भारतका कप्तान सूर्यकुमार यादव ४७ रनमा अविजित रहँदा, ओपनर अभिषेक शर्मा र तिलक बर्माले समान ३१–३१ रन जोडे। शिवम दुबे १० रनमा नटआउट रहे। पाकिस्तानका लागि एक्लै चम्किएका साइम अयुबले भारतका तीनै विकेट झारे।

यसअघि टस जितेर ब्याटिङ रोजेको पाकिस्तानले निर्धारित २० ओभरमा नौ विकेटको क्षतिमा १२७ रन बनाउन सक्यो। टोलीका लागि सहिबजादा फरहानले सर्वाधिक ४० रन जोड्दा शाहिन शाह अफ्रिदीले ३३ रनमा अविजित रहे। फखर जमानले १७, फहिम असरफले ११ र सुफियान मुकिमले १० रन थपे।

भारतीय बलिङतर्फ कुलदीप यादवले तीन विकेट लिए भने जसप्रीत बुमराह र अक्षर पटेलले समान दुई–दुई विकेट झारे। हार्दिक पाण्डेया र वरुण चक्रवर्तीले एक–एक विकेट हात पारे।

समूह ‘ए’ मा यसअघि युएईलाई नौ विकेटले हराइसकेको भारत लगातार दोस्रो जितसँगै चार अंकसहित शीर्ष स्थानमा उक्लिएको छ। पाकिस्तानले भने ओमानमाथि ९३ रनको ठूलो जित हासिल गरे पनि दुई खेलपछि उसको अंक संख्या दुईमै सीमित छ।

पारम्परिक प्रतिद्वन्द्वीबीचको खेलले फेरि भारतको पकडलाई देखाएको छ, जसले आगामी चरणतर्फ उसको यात्रा सहज बनाउन सक्छ। पाकिस्तानका लागि भने बाँकी खेलहरूमा पुनरागमन गर्न दबाब बढेको छ।