सप्तकोशी नदीमा जलसतह फेरि बढेपछि बुधबार बिहान कोशी ब्यारेजका २७ ढोका खोलिएका छन्। जिल्ला प्रहरी कार्यालय सुनसरीका प्रहरी प्रवक्ता योगराज खतिवडाका अनुसार बिहान ११ बजे गरिएको मापनमा पानीको प्रवाह प्रति सेकेण्ड दुई लाख सात हजार ३० क्युसेक पुगेपछि अतिरिक्त ढोका खोलिएको हो।

यसअघि मङ्गलबार राति १० बजे गरिएको मापनमा प्रवाह एक लाख ८२ हजार २८७ क्युसेक पुगेपछि २४ ढोका मात्र खोलिएको थियो। गत भदौ १७ गते भने पानीको बहाव असामान्य रूपमा बढ्दा ५६ मध्ये ३८ ढोका खोलिएको थियो। त्यसयता स्तर क्रमशः घट्दै गएकाले ढोका बन्द गरिएको थियो, तर बुधबार बिहानदेखि फेरि पानी बढ्न थालेको प्रहरीले जनाएको छ।

कोशी ब्यारेजमा पानीको प्रवाह एक लाख ५० हजार क्युसेक नाघेपछि खतराको संकेतस्वरूप रातो बत्ती बाल्ने प्रावधान छ। कन्ट्रोल रुमका अनुसार हाल सो संकेत दिइसकेको छ। पहाडी भेगमा भइरहेको लगातार वर्षाका कारण सप्तकोशीमा पानीको सतह बढेको अधिकारीहरूले जनाएका छन्।

स्थानीय बासिन्दा र तटीय क्षेत्रका बस्तीलाई सचेत रहन आग्रह गरिएको छ। विगतमा बाढीले ठूलो क्षति पुर्‍याएको  इतिहास भएकाले सतर्कता र तयारी अझै बढाउनुपर्ने संकेत अहिलेको परिस्थितिले स्पष्ट गरेको छ।