शुक्रबार बिहान रूसको सुदूर पूर्वी कामचटका प्रायद्वीप र इन्डोनेसियाको सेन्ट्रल पपुवा प्रान्तमा शक्तिशाली भूकम्प अनुभव भएपछि स्थानीय बासिन्दा त्रसित भएका छन्। दुवै क्षेत्र प्रशान्त महासागरको ‘रिङ अफ फायर’ मा पर्ने भएकाले यहाँ बारम्बार भूकम्पीय गतिविधि देखिने गरेको छ।

अमेरिकी भूगर्भीय सर्वेक्षण (USGS) का अनुसार कामचटका प्रायद्वीपमा ७.८ म्याग्निच्युडको भूकम्प राजधानी पेट्रोपाभ्लोभस्क–कामचाट्स्कीबाट करिब १२८ किलोमिटर पूर्व, १० किलोमिटर गहिराइमा केन्द्रित थियो। रूसी जियोफिजिकल सेवाले भने यसलाई ७.४ म्याग्निच्युडका रूपमा मापन गर्दै कम्तीमा पाँचवटा परकम्प आएको जनाएको छ। भूकम्पका कारण भवन र सडकमा पार्क गरिएका सवारी साधनसम्म हल्लिएको भिडियोहरू सामाजिक सञ्जालमा साझा गरिएको छ। सुरुमा जारी गरिएको सुनामी चेतावनी केही घण्टापछि हटाइए पनि अमेरिकी प्यासिफिक सुनामी वार्निङ सेन्टरले नजिकका तटीय क्षेत्रमा खतरनाक छाल आउन सक्ने भन्दै सचेत रहन आग्रह गरेको थियो। कामचटका गभर्नर भ्लादिमिर सोलोदोभले टेलिग्राममार्फत प्रतिक्रिया दिँदै बासिन्दालाई शान्त रहन अपिल गरेका छन्। हालसम्म मानवीय वा भौतिक क्षतिको आधिकारिक विवरण सार्वजनिक भएको छैन।

त्यसैबेला, इन्डोनेसियाको सेन्ट्रल पपुवा प्रान्तमा पनि भूकम्प महसुस भएको छ। USGS ले यसलाई ६.१ म्याग्निच्युड बताएको छ भने इन्डोनेसियाको BMKG एजेन्सीले ६.६ म्याग्निच्युड र २४ किलोमिटर गहिराइमा केन्द्रित रहेको उल्लेख गरेको छ। नबिरे सहरबाट करिब २८ किलोमिटर दक्षिणतिर केन्द्रित यस भूकम्पले स्थानीय समुदायलाई आत्ताएको छ, यद्यपि अहिलेसम्म ठूलो क्षतिको पुष्टि भएको छैन।

जापानदेखि दक्षिणपूर्व एसिया हुँदै प्रशान्त बेसिनसम्म फैलिएको ‘रिङ अफ फायर’ भूकम्पीय चापको कारण रूस र इन्डोनेसियाजस्ता तटीय मुलुकहरू निरन्तर जोखिममा पर्ने गरेका छन्। यी पछिल्ला घटनाहरूले भूकम्पीय संवेदनशील क्षेत्रमा दीर्घकालीन पूर्वाधार तयारी र द्रुत उद्धार क्षमताको आवश्यकतालाई फेरि एकपटक स्मरण गराएको छ।