नक्खु कारागार जलेपछि: मनिष झाको नेतृत्वमा रवि लामिछानेको ‘फिल्मी’ रिहाइ
काठमाडौं — जेनजी आन्दोलनको दोस्रो दिन नक्खु कारागारमा आगो लाग्दा दृश्य साँच्चै अभूतपूर्व बन्यो। आगो र धुवाँले भरिएको कारागार परिसरबीच राष्ट्रिय स्वतन्त्र पार्टीका नेता ‘जेनजी अंकल’ मनिष झाको नेतृत्वमा भएको हिंस्रक प्रदर्शनले पार्टी सभापति रवि लामिछानेलाई जेलबाट मुक्त गर्यो। लामिछानेमाथि प्रधानमन्त्री बन्ने तयारी चलिरहेको चर्चा तीव्र भइरहेका बेला आएको यो नाटकीय क्षणले राजनीतिक वृत्त मात्रै होइन, सडकसम्म नै हलचल पैदा गर्यो।
कारागारका ढोका भत्किँदै गर्दा भीडले उनलाई नायकसरह स्वागत गर्यो। बाहिर निस्किएलगत्तै विजय उत्सवजस्तो माहोल सिर्जना भयो। तर, स्वतन्त्रताको त्यो क्षणमा लामिछानेले घर फर्कन पनि सामान्य बाटो रोजेनन्। उनको आग्रह थियो—गाडी सनरुफ भएको हुनुपर्छ। तत्काल उपलब्ध सवारी साधन सामान्य भएकाले साथी गायक रामकृष्ण ढकाललाई सम्पर्क गरेर गाडीको व्यवस्था गर्न भनियो। ढकालको गाडी सामान्य भए पनि चालक भने उनले नै उपलब्ध गराए। सनरुफ भएको गाडी खोज्न करिब दुई घण्टा लाग्यो। त्यो समयभर लामिछाने खुला आकाशमुनि प्रतीक्षारत बसे, भीडले नजर टिकाइरह्यो।
अन्ततः सनरुफ भएको गाडी आइपुग्दा उनले हिन्दी फिल्मको शैलीमा आधा शरीर बाहिर निकालेर हात हल्लाउँदै यात्रा गरे। यो दृश्यलाई आन्दोलनकारीले तमासा सरह हेरे, सामाजिक सञ्जालमा भिडिओहरू भाइरल बने र जनताबीच राजनीतिक नेतृत्वको नाटकीयता र जिम्मेवारीबीचको दूरीबारे प्रश्नहरू उब्जिए।
मनिष झाको नेतृत्वमा भएको आक्रामक आन्दोलनले सरकार र सुरक्षासंस्थाको क्षमतामाथि गम्भीर प्रश्न उठाएको छ। राज्य संयन्त्रले तत्काल प्रतिक्रिया दिन नसकेको र भीड नियन्त्रणमा पूर्ण असफल भएको आलोचना बढेको छ। त्यस्तै, हिंस्रक आन्दोलनमार्फत व्यक्तिको रिहाइ हुने प्रवृत्तिले कानूनको शासन र लोकतान्त्रिक प्रक्रियामाथि खतरा पुगेको भन्दै कानुनविद्हरूले चेतावनी दिएका छन्।
राष्ट्रिय स्वतन्त्र पार्टीका कार्यकर्ताले भने लामिछानेलाई “जनताको वास्तविक आवाजको प्रतिनिधि” भन्दै समर्थन जनाएका छन्। तर मानवअधिकारकर्मीहरूले हिंस्रक ढंगले जेल जलाएर कैदी निकाल्नुलाई खतरनाक मोडको संकेत भन्दै प्रश्न उठाएका छन्।
नक्खु कारागारबाट सुरुवात भएको यो नाटकीय दृश्यले केवल एक नेताको स्वतन्त्रता मात्रै होइन, आगामी राजनीतिक यात्रामा आन्दोलन, शक्ति र कानूनबीचको द्वन्द्वलाई अझ प्रस्ट्याएको छ। अब प्रश्न के छ भने—जनताको क्रोध र उत्साहले जन्माएको यो क्षणले नेपालको शासन र लोकतन्त्रलाई कता लैजाने हो?
सूचना : राष्ट्रिय स्वतन्त्र पार्टीका सभापति रवि लामिछाने पुनः जेल फर्किनुभएको छ, सम्बन्धित सबै पक्षलाई यसबारे अवगत रहन अनुरोध गरिन्छ।
