काठमाडौं उपत्यकाको चक्रपथ क्षेत्रमा मंगलबार बिहानदेखि कर्फ्यू आदेश जारी गरिएको छ। जिल्ला प्रशासन कार्यालय काठमाडौंले जारी गरेको सूचनाअनुसार आज बिहान ८:३० बजेदेखि अर्को सूचना नआएसम्म चक्रपथभित्र सर्वसाधारणलाई आवतजावत, भीडभाड र सार्वजनिक गतिविधिमा रोक लगाइएको हो।

प्रशासनले कर्फ्यूको दायरामा काठमाडौँ महानगरपालिकाको बालकुमारी पुलदेखि कोटेश्वर चोक, सिनामंगल, गौशाला, चाबहिल, नारायणगोपाल चोक, गोङ्गबु, बालाजु, स्वयम्भू, कलंकी, बल्खु हुँदै बागमती नदी पुलसम्मको सम्पूर्ण भू–भाग परेको स्पष्ट पारेको छ। यस क्षेत्रमा बसोबास गर्ने वा अत्यावश्यक कारणले निस्किनुपर्ने अवस्थामा समेत स्थानीय प्रशासनबाट विशेष अनुमति लिनुपर्ने व्यवस्था गरिएको छ।

अहिलेसम्म कर्फ्यू किन लगाइयो भन्नेबारे प्रशासनले विस्तृत कारण खुलाएको छैन। तर पछिल्ला दिनमा उपत्यकामा विभिन्न समूहले आआफ्ना माग राखी विरोध प्रदर्शन तीव्र पारेका घटनाले सुरक्षामाथि दबाब परेको संकेत देखिएको छ।

काठमाडौंको चक्रपथ मुलुककै मुख्य यातायात सञ्जाल मानिने भएकाले यस क्षेत्रमा कर्फ्यू आदेशले जनजीवन र आवागमनमा ठूलो असर पर्न सक्ने अनुमान गरिएको छ। नागरिकको सुरक्षा सुनिश्चित गर्दै शान्ति–व्यवस्था कायम राख्ने दाबी प्रशासनले गरे पनि यो कदमले जनतामा अझै बढी असहजता थप्ने देखिन्छ। अब अवस्था कति छिटो सामान्य बन्छ भन्ने प्रश्नमा सबैको दृष्टि केन्द्रित भएको छ।