पूर्व अमेरिकी नागरिक तथा नेपालका पूर्व उपप्रधानमन्त्री र राष्ट्रिय स्वतन्त्र पार्टीका सभापति रवि लामिछाने पक्राउ परेपछि उनका समर्थकहरूले सडकमा तमासा मच्चाउन थालेका छन्। सहकारी ठगी प्रकरणमा अनुसन्धानका लागि उनलाई पक्राउ गरिएको हो। तर, लामिछानेका कार्यकर्ताहरूले आफूलाई कानूनभन्दा माथि ठान्ने शैली देखाउँदै प्रहरी र सरकारविरुद्ध सडकमा नाराबाजी गरेका छन्।

लामिछानेले आफू निर्दोष रहेको दाबी गर्दै सहकारी ठगहरूलाई सत्तारूढ दलले संरक्षण दिएको आरोप लगाएका छन्। यस आरोपलाई उनको समर्थक समूहले पत्याउँदै कानुनी प्रक्रिया नै अवरोध गर्ने गरी सडकमा उत्रिएका छन्। पोखरा लैजाने क्रममा विभिन्न स्थानमा सडक अवरोध र प्रदर्शन गरिनु कानुनी राज्यमा अस्वीकार्य हो। यो रवैया कुनै राजनीतिक परिवर्तनको लागि संघर्ष होइन, बरु व्यक्ति विशेषलाई संरक्षण दिन खोजिएको स्पष्ट हुन्छ।

प्रहरीले लामिछानेलाई अनुसन्धानका लागि हिरासतमा राख्न राति ३ बजे पोखरामा पुर्याएको थियो। अदालतको आदेशमा गरिएको यो प्रक्रियालाई भंग गर्न कार्यकर्ताहरूले निरन्तर नाराबाजी गर्दै अस्थिरता मच्चाइरहेका छन्। यस्तो समयमा, जब अनुसन्धान प्रक्रियामा धैर्य गर्नुपर्ने हुन्छ, उनीहरू आन्दोलनको नाममा तमासा गरिरहेका छन्।

यसबाहेक, कास्की प्रहरीले लामिछानेका लागि विशेष व्यवस्था गरेको छ। उनलाई सामान्य थुनुवा जस्तो व्यवहार गरिएको छैन। सफा, न्यानो बिस्तर, छुट्टै बस्नको व्यवस्था, मिठो खाना—सबै सुविधा दिइएको छ। प्रहरी हिरासत उनीजस्ता ठूला बडाका लागि कुनै कष्टकर हुँदैन। थुनामा भए पनि उनलाई विशेष अधिकार दिइएको छ। यस्तो अवस्थामा समर्थकहरू किन हल्ला गरिरहेका छन्?

लामिछानेको गिरफ्तारी कानुनी प्रक्रिया हो। अनुसन्धानलाई प्रभावित पार्ने यो हर्कतले उनीमाथि लागेको आरोपको गम्भीरतालाई झन् बढाउनेछ। तर, समर्थकहरूले कानुनको पालना गर्ने र अनुसन्धानलाई धैर्यपूर्वक कुर्ने स्थानमा सडकमा तमासा देखाइरहेका छन्। यो केवल एउटा कानुनी मुद्दा हो, जसलाई न्यायिक प्रक्रियाले समाधान गर्ने हो। सबैले धैर्य गर्नुपर्छ र अनुसन्धानको नतिजा कुर्नुपर्छ, किनकि देशमा कानून सबैका लागि समान हुनुपर्छ।

समर्थकहरूले याद गर्नुपर्ने मुख्य कुरा के हो भने, लामिछाने कुनै साधारण थुनुवा होइनन्। उनलाई सम्मानजनक तरिकाले हिरासतमा राखिएको छ। कुनै प्रकारको अमानवीय व्यवहार गरिएको छैन। त्यसैले, उनीहरूलाई अत्तालिनुपर्ने कारण छैन। यसमा देशभर तमासा देखाउन जरुरी छैन। सबैले धैर्य राख्नुपर्छ र अनुसन्धानलाई स्वतन्त्र रूपमा अघि बढ्न दिनुपर्छ।

लामिछानेको बचाउ गर्न कानून मिच्ने कामले न्याय प्रणालीमा विश्वास नगरेको देखाउँछ। अनुसन्धानलाई प्रभावित नगरौं, र हरेक नागरिकलाई कानूनको सम्मान गर्ने संस्कार बसालौं।

रवि लामिछाने