काठमाडौं। राष्ट्रिय स्वतन्त्र पार्टीका सभापति तथा गोर्खा मिडिया नेटवर्कका तत्कालीन निर्देशक रवि लामिछानेमाथि तीनवटा गम्भीर अपराधका आरोप लगाइएको छ। उनीमाथि सहकारी ठगी, किर्ते, र संगठित अपराधमा संलग्न भएको आरोपमा प्रहरीले अनुसन्धान अघि बढाएको छ। यी आरोप प्रमाणित भए, उनलाई कम्तिमा ७ वर्षको जेल सजाय हुने प्रबल सम्भावना छ।

प्रहरीले सहकारी ठगीको आरोपमा उनलाई शुक्रबार साँझ काठमाडौंबाट पक्राउ गरेको थियो। सूर्यदर्शन सहकारीका १८ हजार ७५० जना सर्वसाधारणले बचत गरेको रकम ठगी गरेको आरोपमा लामिछानेविरुद्ध कास्की जिल्ला अदालतमा मुद्दा पेस गरिँदैछ। सूर्यदर्शन सहकारीको ठूलो मात्रामा रकम हिनामिना भएपछि प्रहरीले लामिछानेलाई पक्राउ गरेको हो। यो प्रकरणले धेरै सर्वसाधारणको बचतमा ठगी गरेको र योजनाबद्ध रूपमा रकम हिनामिना गरिएको देखिन्छ।

लामिछानेमाथि तीनवटा मुख्य आरोप लगाइएको छ। पहिलो, सहकारी ठगीको आरोप हो, जसमा लामिछानेले सूर्यदर्शन सहकारीमा सर्वसाधारणले बचत गरेको रकम हिनामिना गरेको बताइएको छ। सहकारी ऐन, २०७४ अनुसार, ठगी प्रमाणित भए उनलाई ६ देखि ८ वर्षसम्मको जेल सजाय र जरिवाना हुनसक्छ। दोस्रो, किर्ते कागजातको प्रयोग गरेको आरोप छ, जुन कागजातहरूले सहकारीको बचत रकम अन्यत्र लैजान प्रयोग गरिएको थियो। मुलुकी अपराध संहितामा किर्ते कागजात प्रयोग गर्नेलाई ७ वर्षसम्मको जेल सजाय र ७० हजार रुपैयाँसम्मको जरिवानाको व्यवस्था छ। तेस्रो, संगठित अपराधमा संलग्नता रहेको आरोप हो, जसमा उनीमाथि योजनाबद्ध रूपमा समूह बनाइ ठगी गरेको देखिन्छ। संगठित अपराध प्रमाणित भए, मुख्य सजायमा थप ५० प्रतिशत कैद थपिनेछ, जसले जेल सजायलाई अझ कडा बनाउन सक्छ।

प्रहरीले तीनवटा आरोपमा अनुसन्धान गरी अदालतमा प्रतिवेदन पेश गर्ने तयारी गरिरहेको छ। लामिछाने दोषी ठहर भए, कम्तिमा ७ वर्षको जेल सजाय पक्का हुनेछ भने संगठित अपराध प्रमाणित भए, यो सजायमा थप कैदसमेत हुन सक्नेछ।

रवि लामिछाने