सुनसरीमा १६ वर्षीया नेपाली किशोरीलाई चिनियाँ नागरिकसँग जबरजस्ती विवाह गराउँदै गर्दा प्रहरीले हस्तक्षेप गरी ८ जनालाई पक्राउ गरेको छ। उक्त घटना सुनसरीको चतरास्थित औलिया बाबाको मन्दिरमा भएको हो, जहाँ धनकुटा छथर जोरपाटी-२ की किशोरीलाई ३३ वर्षीय चिनियाँ नागरिक ली टेङसँग विवाह गराउन लागिएको थियो। ली टेङ चीनको हुबेई प्रान्तका निवासी हुन्।

पक्राउ पर्नेहरूमा किशोरीका बाबु, ३३ वर्षीय ली टेङ, उदयपुर बेलका नगरपालिका-९ का ४३ वर्षीय दीपक दर्जी, ४२ वर्षीय बद्री विक्रम राई, स्याङ्जा पुतलीबजार नगरपालिका-१२ का २० वर्षीय शितल गुरुङ, काभ्रेपलान्चोकको रोशी गाउँपालिका-३ की २० वर्षीया रोशनीमाया तामाङ, तथा दुई चिनियाँ नागरिक ३५ वर्षीय डोङ शिहाओ र वु हेजी रहेका छन्।

नेपालको कानुन अनुसार विवाहका लागि उमेर २० वर्ष पुगेको हुनुपर्छ। जबरजस्ती विवाह गराउन खोज्नेहरूलाई कानुनी रूपमा ३ वर्षसम्मको कैद र ३०,००० रुपैयाँसम्म जरिवाना हुनसक्छ भन्ने व्यवस्था मुलुकी देवानी संहिता २०७४ मा छ।

सुनसरी प्रहरी प्रमुख सुमन तिम्सिनाले किशोरीको जबरजस्ती विवाह रोकिएको जानकारी दिए। किशोरीका बाबुले छोरीको राम्रो होस् भन्ने सोचले विवाह गराएको बताए पनि एसपी तिम्सिनाका अनुसार छिमेकी किशोरीले पनि चिनियाँसँग विवाह गरेपछि उनीहरूले यसमा सहमति जनाएका थिए।

प्रहरीले चिनियाँ पक्षको संलग्नताको कारणबारे अनुसन्धान गरिरहेको छ। किशोरीका आफन्तले जबरजस्ती विवाह हुन लागेको थाहा पाएपछि प्रहरीलाई जानकारी गराएका थिए, जसपछि प्रहरीले विवाह स्थलमा पुगेर हस्तक्षेप गरेको थियो।