काठमाडौं: राष्ट्रिय स्वतन्त्र पार्टीका पूर्वमहामन्त्री डा. मुकुल ढकालले सोमबार बिहान प्रधानमन्त्री केपी शर्मा ओलीलाई भेटी १५ बुँदे सुझाव पत्र बुझाएका छन्। संविधान संशोधनदेखि प्रशासन सुधारसम्मका मुद्दाहरू समेटिएको यस सुझावमा स्थानीय सरकारका भ्रष्टाचार नियन्त्रण, मिटरव्याज पीडितको समस्या समाधान, अस्पतालसम्म पुग्ने पिच रोड निर्माण, र न्यायालय सुधारजस्ता विषय उल्लेख गरिएको छ।

ढकालले संविधान संशोधनका क्रममा उपराष्ट्रपति, प्रदेश संरचना, र जिल्ला समन्वय समिति जस्ता सेरमोनियल र अप्रभावी संरचनाहरू खारेज गर्नुपर्ने ठोस सुझाव दिएका छन्। उनले भनेका छन्, “प्रदेश संरचनालाई लिएर जनतामा व्यापक निराशा र आक्रोश रहेको छ, त्यसैले प्रदेशहरू खारेज गर्नु नै उचित हुनेछ। उपराष्ट्रपति जस्तो सेरमोनियल पद र जिल्ला समन्वय समितिलाई खारेज गर्नुपर्छ।”

यस्तै, निर्वाचन प्रणालीमा सुधार ल्याउन थ्रेसहोल्ड बढाउने र समानुपातिकबाट एक पटक निर्वाचित भएका व्यक्तिलाई पुनः समानुपातिकबाट निर्वाचित हुन नपाउने व्यवस्था गर्नुपर्ने सुझाव पनि उनले दिएका छन्। "स्थिर निर्वाचन प्रणाली अवलम्बन गरियोस्, तर समावेशिताको उपलब्धिलाई अझै सुदृढ गरियोस्," ढकालले भने।

ढकालले एक पटक नागरिकता त्यागेका व्यक्तिलाई राज्यको महत्त्वपूर्ण उच्च ओहदामा नियुक्त नगर्नुपर्ने माग पनि गरेका छन्। "एक पटक नेपाली नागरिकता त्यागेका व्यक्तिले फेरि नेपाली नागरिकता लिएमा उनीहरूलाई संविधान अनुसार उच्च ओहदामा नियुक्ति दिनुहुँदैन," उनले स्पष्ट पारे। उनले विदेशमा रहेका नेपाली श्रमिकहरूको उद्धार र राहतका लागि आवश्यक कार्यक्रम ल्याउन पनि जोड दिएका छन्।

सुझावको प्रमुख बुँदाहरू:

1. संविधान संशोधन:

   • उपराष्ट्रपति जस्ता सेरमोनियल पदहरू खारेज गर्नुपर्छ।
   • प्रदेश संरचना र जिल्ला समन्वय समिति खारेज गर्ने प्रस्ताव।
   • प्रदेश संरचनामा जनतामा निराशा र आक्रोश रहेको भन्दै तत्काल खारेज गर्नुपर्ने माग।

2. निर्वाचन प्रणाली सुधार:

   • थ्रेसहोल्ड बढाउने।
   • समानुपातिकबाट निर्वाचित व्यक्तिले पुन: समानुपातिकबाट निर्वाचनमा भाग नलिने।
   • ब्लक भोटिङ सिस्टमसहित अन्य प्रणालीको अवलम्बन गरी स्थिर सरकारको लागि आवश्यक संशोधन।

3. नागरिकता:

   • एकपटक नागरिकता त्यागेका व्यक्तिहरूलाई महत्त्वपूर्ण उच्च ओहदामा नियुक्ति नदिनु पर्ने।

4. वैदेशिक रोजगारी:

   • विदेशमा समस्यामा परेका नेपालीहरूको उद्धार र राहतका लागि तत्काल आवश्यक कार्यक्रम ल्याउने।

रवि लामिछानेप्रति आलोचना:

डा. ढकालले रवि लामिछानेले अमेरिका गएर अवसर खोजे पनि उनीजस्ता व्यक्तिलाई उच्च राजनीतिक पदमा अवसर दिन नहुने बताएका छन्। रवि लामिछानेसँग मतभेद रहेको कुरा उनले प्रधानमन्त्रीलाई दिएका सुझावहरूमा झल्किन्छ। ढकाललाई हालै पार्टीबाट निलम्बन गरिएको थियो, जसको कारण उनका क्रान्तिकारी भनाइहरू बनेका छन्।

प्रधानमन्त्री ओलीले ढकालले दिएका सुझावलाई आवश्यक काम कारबाही अघि बढाउने विश्वास व्यक्त गरेका छन्।