निर्मम तरिकाले कुकुर मार्ने दुई जना पक्राउ परेका छन् । पाँच वटा कुकुरको बच्चा र एउटा माउ मारिरहेको भिडियो सामाजिक सञ्जाल फेसबुकमा पोस्ट गरेपछि नवलपरासी प्रहरीले दुई जनालाई पक्राउ गरेको हो । पक्राउ पर्नेमा सुस्ता गाउँपालिका–५ बेलवानीका ३३ वर्षीय राजकुमार सारु र सोही ठाउँका २८ वर्षीय अमनकुमार चिडी रहेका छन् ।

अमन र राजकुमारले नारायणी नदीको छेउ ठांडीघाटस्थित ५ नम्बर ठोक्कर नदीको छेउमा पुस १३ गते कुकुर र कुकुरका बच्चा मार्दै गरेकोमा भिडियो बनाई आफ्नो सामाजिक सञ्जाल फेसबुकबाट पोस्ट गरेका थिए । उनीहरूमाथि मुलुकी अपराध संहिताको पशुपक्षीसम्बन्धी कसुरमा मुद्दा चलाइनेछ ।

पशुपक्षीसम्बन्धी कसुरमा तीन महिनासम्म कैद वा ५ हजार जरिवाना वा दुवै सजायको दफा उल्लेख गरी प्रतिवेदन तयार भएको र त्यसको आधारमा मुद्दा चलाइने तयारी गरिएको प्रहरीले जनाएको छ ।