नयाँ दिल्ली, १० नोभेम्बर २०२५ — भारतको राजधानी नयाँ दिल्लीको मुटुमा रहेको रेड फोर्ट मेट्रो स्टेशन नजिक शक्तिशाली कार बम विस्फोट हुँदा कम्तीमा १३ जनाको मृत्यु र २० भन्दा बढी घाइते भएका छन्। साँझ ६:५२ बजे ‘ह्युन्डाई i20’ कारभित्र भएको विस्फोटले वरपरका सवारीसाधन र संरचनामा आगलागी र क्षति पुर्‍याएको प्रहरी स्रोतले जनायो। प्रारम्भिक अनुसन्धान अनुसार बममा प्रयोग गरिएको प्रमुख विष्फोटक पदार्थ अमोनियम नाइट्रेट हो।

उक्त कार गुरुग्राममा HR26 नम्बरमा दर्ता भएको थियो, जसको पहिलो मालिक मोहम्मद सलमान थिए। सात पटक हात फेरेपछि कार अन्ततः डा. उमर नबी (कश्मीरका चिकित्सक) को हातमा पुगेको र उनले नै विस्फोट गराएको अनुसन्धानमा खुलेको छ। नबीको सम्बन्ध जैश–ए–मोहम्मद (JeM) आतङ्कवादी समूहसँग जोडिएको छ।

उक्त दिनै फरीदाबादमा जम्मु–कश्मीर, हरियाणा र उत्तरप्रदेश प्रहरीले संयुक्त अपरेसनमार्फत २,९०० किलो विस्फोटक पदार्थ, AK-47 र बरेट्टा पिस्तोल सहित ठूलो मात्रामा बम बनाउने सामग्री बरामद गरेको थियो। यो घटनामा डा. आदिल अहमद राथर (सहारनपुर), डा. मुज्जमिल (फरीदाबाद) र डा. शाहीन शाहिद (लक्नउ) पक्राउ परेका छन्। शाहीनलाई जैश–ए–मोहम्मदको महिला विंगको भारत प्रमुख मानिएको छ।

दिल्ली प्रहरी विशेष शाखा र NIA ले यो घटनालाई आतङ्ककारी हमला मानेर UAPA ऐन अन्तर्गत मुद्दा दर्ता गरेको छ। प्रारम्भिक प्रमाणहरू अनुसार यसमा पाकिस्तानस्थित आतङ्कवादी सञ्जालको हात रहेको देखिन्छ — जसको रणनीति पुलवामा (२०१९) र पहलगाम (२०२५) आक्रमणसँग मिल्दोजुल्दो छ।

आतङ्कवादको भौतिक उपस्थितिमा कमी आएको भए पनि यसको बौद्धिक र आर्थिक सञ्जाल अझै सक्रिय छ — जसले भारतलाई फेरि विश्व आतंकविरुद्धको लडाइँको अग्रपंक्तिमा उभ्याएको छ।

— नेपाल आज अन्तर्राष्ट्रिय डेस्क

नयाँ दिल्ली लाल किल्ला विस्फोट