भूमि अध्यादेशको संकट: उपेन्द्र र महन्थको निर्णयले सत्ता गठबन्धनलाई पुर्यायो ठूलो धक्का!
काठमाडौं -उपेन्द्र यादव नेतृत्वको जनता समाजवादी पार्टी (जसपा) नेपाल र महन्थ ठाकुर नेतृत्वको लोकतान्त्रिक समाजवादी पार्टी (लोसपा) का निर्णयले सरकारलाई ठूलो संकटमा पुर्याएको छ। सरकारले ल्याएको भूमि अध्यादेश पारित गराउन अब बहुमत जुटाउन सरकारलाई कठिनाइ हुनेछ। जसपा नेपाल र लोसपाले अध्यादेशमा असहमत भएर समर्थन नगर्ने निर्णय गरेका छन्, जसले सरकारको योजनामा पानी फेरिदिएको छ।
राष्ट्रियसभामा निर्णायक भूमिका खेल्ने जसपा नेपालले ६ मध्ये ५ अध्यादेशलाई मात्रै समर्थन गर्ने निर्णय गरेपछि सरकारलाई ठूलो धक्का लागेको हो। यसका साथै, लोसपाका अध्यक्ष महन्थ ठाकुरले पनि यो अध्यादेशलाई अस्वीकार गरेको छन्।
प्रधानमन्त्री केपी शर्मा ओली र कांग्रेस सभापति शेरबहादुर देउवाले यस अध्यादेशलाई पारित गराउन समर्थन मागेपछि उपेन्द्र यादवले पार्टी उपाध्यक्ष राजकिशोर यादवको नेतृत्वमा अध्ययन कार्यदल पनि बनाएका थिए। यस कार्यदलको सुझावपछि, जसपा नेपालको संसदीय दलको बैठकले अध्यादेशलाई राष्ट्रको हितमा नरहेको निष्कर्षमा पुगेको छ।
उपेन्द्र यादवले विज्ञप्ति जारी गर्दै भने, "यो अध्यादेशले मुलुकलाई छिन्नभिन्न पार्ने सम्भावना रहेको छ। यसले भ्रष्टाचार, कमिसनखोरी र भूमि माफियाहरुलाई फाइदा पुर्याउँछ।" जसपा नेपालको निर्णयपछि, सरकारले ल्याएको भूमि अध्यादेशको भविष्य अनिश्चित भएको संकेत दिइएको छ।
माओवादी र नेकपा एकीकृत समाजवादी पार्टीले पनि भूमि अध्यादेशको विरोध गर्न थालेका छन्। यस कारण राष्ट्रियसभामा जसपा नेपालको ३ सीट निर्णायक बन्छ।
त्यस्तै, कांग्रेस र एमालेका नेताहरूले उपेन्द्र यादवको निर्णयलाई सत्ताको लागि बार्गेनिङको प्रयास भनेका छन्, तर जसपा नेपालका नेताले यसलाई नकारेका छन्। भूमि व्यवस्था मन्त्री बलराम अधिकारीले पनि सरकारको भूमि अध्यादेशको गलत व्याख्या भएको दाबी गरेका छन्। यसरी भूमि अध्यादेशको पारित हुनु र सरकारको भविष्य दुवै अनिश्चित बनेका छन्, र नेपालमा राजनीतिक समीकरण फेरिन सक्ने संकेत देखिएका छन्।
