शिवरात्रिमा सेनाका हेलिकोप्टर चारथरि पाहुना बोकेर चारतिर
काठमाडौंको आकाश बुधबार बिहान सैनिक हेलिकोप्टरहरूले भरिएको देखियो। नेपाली सेना दिवस तथा महाशिवरात्रिको अवसरमा विभिन्न महत्त्वपूर्ण उडानहरू सञ्चालन भए।
बिहानै ६:३० बजे भारतीय स्थल सेनाका पूर्व सेनाध्यक्ष मनोज मुकुन्द नरवाने, मनोज पाण्डेसहित ६ जनाको टोली मुक्तिनाथ गएका छन्। उनीहरू सेनाको एनए ०३८ एमआई हेलिकोप्टरमार्फत सीतापाइलास्थित ब्यारेकबाट उडेका हुन्।
त्यसैगरी, बिहान ७:३० बजे विभिन्न देशका राजदूतावासका डिफेन्स अट्याचीहरूलाई एनए ०६२ कासा हेलिकोप्टरमार्फत माउन्टेन फ्लाइट गराइएको छ। फ्लाइटपछि उनीहरू पोखरा गएका छन् र अपराह्न काठमाडौं फर्कने कार्यक्रम छ।
यसैबीच, ८:१५ बजे एनए ०६४ स्काइ ट्रकले एनसीसी डिजी टिम बोकेर माउन्टेन फ्लाइट गरिरहेको छ। उडान सम्पन्न भएपछि टोली काठमाडौं नै फर्कनेछ।
त्यसपछि, साढे ९ बजे रक्षा मन्त्री मनवीर राईसहितको टोली एनए ०६१ हेलिकोप्टरमा नवलपरासी जाने तयारीमा छ।
