बानेश्वरस्थित मैत्री हलमा आयोजित भूमिसम्बन्धी अध्यादेश विषयक अन्तर्क्रिया कार्यक्रममा राष्ट्रिय योजना आयोगका पूर्व सदस्य डा. उमाशंकर प्रसादले चर्को तर्क राख्दै भने— "नेपालमा भूमि नभएकाले कोही गरिब हुन्छ भन्ने अवधारणा गलत हो। यो मानसिकता त्याग्नुपर्छ।"

उनले नेपालमा भर्टिकल फार्मिङ को सम्भावनाबारे विशेष जोड दिँदै भने, "प्रविधिको सहि उपयोग गरियो भने भूमिको अभाव महसुस गर्नुपर्ने अवस्था नै आउँदैन। सीमित भूभागलाई उच्च क्षमतामा उपयोग गरेर कृषि उत्पादन बढाउन सकिन्छ।"

कार्यक्रममा सहभागी पूर्वप्रधानमन्त्री माधव नेपालको भनाइलाई खण्डन गर्दै प्रसादले कटाक्ष गर्दै भने, "एउटा प्रधानमन्त्रीले अर्को प्रधानमन्त्रीको किन विरोध गर्नुपर्छ? तपाईं पनि देशको नेतृत्व गरिसक्नुभएको छ, तर तपाईंले के गर्नुभयो भन्ने प्रश्न उठ्न सक्छ।"

उनले नेपालमा हुने अनावश्यक आरोप–प्रत्यारोप को प्रवृत्तिलाई आलोचना गर्दै थपे, "हामीले गालीगलौज गरेर होइन, समाधान खोजेर विकासको बाटो समात्नुपर्छ। कसरी नेपाललाई अगाडि बढाउने भन्नेबारे गम्भीर बहस हुन आवश्यक छ।"

भूमिसम्बन्धी नीतिगत छलफलमा यस्ता खुला र प्राविधिक समाधानका विचारहरू आउनु सकारात्मक संकेत भए पनि राजनीतिक आरोप–प्रत्यारोपले मूल विषय ओझेलमा पर्ने खतरा प्रसादले औंल्याए। "अब बहस गालीगलौजमा सीमित नराखी, समाधानमुखी हुनु जरुरी छ," उनले भने।

डा. उमाशंकर प्रसाद