सन् २०२४ मा चिनियाँ साइबर जासूसी अभूतपूर्व रूपमा बढेको छ, जसमा अमेरिकी स्वार्थहरू विरुद्ध आक्रमणहरूको दर तीव्र रूपमा उकालो लागेको क्राउडस्ट्राइकको एक प्रतिवेदनले देखाएको छ। अमेरिकी साइबर सुरक्षासँग सम्बन्धित अनुसन्धानमा ख्यातिप्राप्त यस कम्पनीले चिनियाँ साइबर आक्रमणमा १५० प्रतिशत वृद्धि भएको तथ्य उजागर गरेको छ। परम्परागत म्यालवेयर आक्रमणको तुलनामा हाल आक्रमणकारीहरूले कृत्रिम बुद्धिमत्ता (AI) प्रविधिको उपयोग गरी झूट्टा पहिचान सिर्जना गर्ने, इमेल पठाउने र सामाजिक इन्जिनियरिङ गर्ने प्रवृत्तिमा परिवर्तन ल्याएका छन्।

यस प्रकारको AI-संचालित विधिले अमेरिकी वित्तीय, सञ्चार तथा औद्योगिक क्षेत्रमा ३०० प्रतिशतसम्म आक्रमणको वृद्धिलाई निम्त्याएको छ। फेब्रुअरी २७ मा सार्वजनिक "२०२५ क्राउडस्ट्राइक ग्लोबल थ्रेट रिपोर्ट" अनुसार, यस्ता प्रविधिहरू झूट्टा प्रोफाइल बनाउने, इमेल उत्पादन गर्ने तथा सामाजिक सञ्जालहरूमा प्रभाव पार्ने जस्ता विधिहरू प्रयोग गर्दै छन्, जसले साइबर जासूसीलाई झन प्रभावकारी बनाइरहेको छ।

"वाइस फिसिङ" वा "भिशिङ आक्रमण" जहाँ आक्रमणकारीहरूले सिधै टेलिफोन मार्फत शिकार खोज्छन्, ४४२ प्रतिशतले बढेको देखिएको छ। क्राउडस्ट्राइकको प्रतिवेदनअनुसार २०२४ मा भएका सबै आक्रमणमध्ये ५२ प्रतिशत प्रारम्भिक पहुँच उल्लङ्घन (initial access intrusions) बाट भएका थिए। यसबाहेक, "एक्सेस ब्रोकर" हरूको भूमिका उल्लेखनीय रूपमा बढेको देखिएको छ, जसले ५० प्रतिशत वृद्धि गर्दै ह्याकरहरूलाई लक्षित संस्थामा प्रवेश गर्न सहयोग पुर्‍याइरहेका छन्।

चिनियाँ कम्युनिष्ट पार्टी (CCP) ले साइबर जासूसीलाई विदेशी राजनीतिक तथा सैन्य प्रतिस्पर्धीहरूमाथि दबाब सिर्जना गर्नका लागि मुख्य अस्त्रको रूपमा प्रयोग गरिरहेको क्राउडस्ट्राइकको प्रतिवेदनले देखाएको छ। उत्तर कोरियाली साइबर समूह "फेमस चोलिमा" अमेरिकी कम्पनीहरूमा घुसपैठ गर्न सक्रिय रहेको छ। यस समूहले अमेरिकी राष्ट्रपति चुनावलाई लक्षित गर्दै झूट्टा IT पेशाकर्मीहरू सिर्जना गरी सेवा अवरोध गर्ने कार्यमा संलग्न रहेको बताइएको छ, जसमा चीन, रूस, र इरानको संलग्नता रहेको हुनसक्ने आंशका गरिएको छ।

डोनाल्ड ट्रम्पको चुनावी जितपछि, चिनियाँ आक्रमणकारी समूहहरूले बिचौलियाहरूको सहयोग बिना नै सिधै साइबर आक्रमणमा संलग्न भएको पाइएको छ। अमेरिकी गैर-नाफामूलक संस्था द सौफान सेन्टरको जनवरी रिपोर्टले ट्रम्पको सपथ ग्रहणभन्दा दुई हप्ता अगाडि चिनियाँ साइबर आक्रमण उल्लेखनीय रूपमा बढेको पुष्टि गरेको छ।

यो वृद्धिले CCP को क्षेत्रीय प्रभुत्व विस्तार गर्ने रणनीति प्रतिबिम्बित गर्छ। प्रतिवेदनमा उल्लेख भएअनुसार, चीनको साइबर अपरेसन ताइवानलाई चीनमा गाभ्ने रणनीतिसँग जोडिएको छ, जसले अमेरिका र चीनबीच सैन्य संघर्षको सम्भावना समेत बढाएको छ। यसैबिच, ताइवानको राष्ट्रिय सुरक्षा ब्युरोले जनवरीमा प्रकाशित प्रतिवेदनमा सन् २०२४ मा चिनियाँ साइबर आक्रमणहरू २४ लाख पटक पुगेको उल्लेख गरेको छ, जुन अघिल्लो वर्षको तुलनामा दोब्बर बढी हो।

क्राउडस्ट्राइकको प्रतिवेदनले चिनियाँ कम्युनिष्ट पार्टीले AI प्रविधिलाई आन्तरिक दमनका लागि समेत प्रयोग गरिरहेको देखाएको छ। विशेष रूपमा, फलुन गङ्ग, उइघुर मुस्लिम, प्रजातन्त्र समर्थक कार्यकर्ता, तिब्बत र ताइवानका क्षेत्रमा AI प्रविधिको दुरुपयोग गरी दमनात्मक नीति अपनाइएको छ। चीनले अहिलेसम्म यस प्रतिवेदनमा आधिकारिक प्रतिक्रिया दिएको छैन, तर ऐतिहासिक रूपमा चीनले यस्ता आरोपहरू अस्वीकार गर्दै आएको छ र प्रायः अमेरिका वा बेलायतलाई दोष लगाउने गरेको छ।

तर, चीनको आफ्नै सैन्य सिद्धान्तमा "सूचना युद्ध" र "मनोवैज्ञानिक साइबर अपरेसन" लाई प्रमुख रणनीति मानिएको पाइन्छ। साइबर सुरक्षासम्बन्धी अमेरिकी अध्ययन संस्थान "नेशनल इनिसिएटिभ फर साइबर सेक्युरिटी करियर एन्ड स्टडिज" को अध्ययन अनुसार, CCP को यो सिद्धान्त सूचनालाई सार्वजनिक धारणा निर्माण गर्ने, नीतिगत निर्णयलाई प्रभावित पार्ने र विशिष्ट राजनीतिक तथा सैन्य लक्ष्य प्राप्त गर्नका लागि प्रयोग गर्ने कुरामा केन्द्रित रहेको छ। यसले चीनको साइबर क्षमताको रणनीतिक प्रभाव र AI को भूमिकालाई झन् गहिराइमा चित्रण गर्दछ।