बैंकको ऋण मिनाहा अभियानसँगै चर्चा भएको नाम, राजावादी व्यवसायी दुर्गा प्रसाईं,ले अचम्मको दाबी गरेका छन्। उनले हालै फेसबुकमा लेख्दै भनेका छन् कि सरकार पूर्व राजा ज्ञानेन्द्र शाहलाई नजरबन्दमा राख्ने तयारीमा छ। प्रसाईंका अनुसार, राजतन्त्र पुनःस्थापनाको पक्षमा देशभर माहोल बनेपछि सरकार अत्तालिएको छ र उनी पूर्व राजा शाहको खिलाफ कदम चाल्न लागेको छ।

"आधा देश राजतन्त्रको पक्षमा उभिएको छ, त्यसैले सरकार अत्तालिएको छ," प्रसाईंले फेसबुकमा भनेका छन्। उनी थप्छन्, "मलाई झूठा मुद्दा लगाएर पक्राउ गर्ने तयारी पनि भएको छ।"

प्रसाईंले आफ्नो फेसबुक पेजमा पूर्व राजा र उनका छोरा पारससँगको फोटो पनि शेयर गर्दै यस घटनाको बारेमा आफ्नो विश्वास व्यक्त गरेका छन्। उनका अनुसार, सरकारले २५ गते अगाडि नै उनलाई पक्राउ गर्ने तयारी गरेको छ।

पूर्व राजा शाहको पोखराबाट काठमाडौं फर्किनुको साथ, राजावादी समर्थकहरूले शक्ति प्रदर्शन गर्ने योजना बनाएका छन्। तर, प्रसाईंले भने, "मलाई पक्राउ गर्यो भने पनि, यो आन्दोलन रोकिँदैन। हामी एकजुट भएर राजसंस्थाको पुनःस्थापनाका लागि आन्दोलनको आगो दन्काउनेछौं।"

प्रसाईंले सरकारको विरोध गर्दै आह्वान गरेका छन्, "२५ गते देशभर शक्ति प्रदर्शन गरौं र यी भ्रष्ट शासकहरूको सत्ता च्युत गरौं। नेपाललाई पुनः गौरवपूर्ण देश बनाउनको लागि हामी सबै एकजुट होऔं।"