संयुक्त राज्य अमेरिकामा दुई चिनियाँ नागरिकलाई खतरनाक कृषि फफूँद Fusarium graminearum तस्करीको आरोपमा पक्राउ गरिएको छ, जसले जैविक आतंक (agro-terrorism) को सम्भावित खतरा उजागर गरेको छ। NBC Chicago मा प्रकाशित अनुसन्धानात्मक रिपोर्टका अनुसार, यी फफूँदहरू अमेरिकी खाद्य प्रणालीलाई प्रभावित पार्ने क्षमतायुक्त छन्, जसले केवल आर्थिक क्षति मात्र होइन, सार्वजनिक स्वास्थ्य र राष्ट्रिय सुरक्षामै प्रश्न उठाउने अवस्था ल्याउन सक्छ।

अमेरिकी न्याय विभागका अनुसार, अभियुक्तहरू उच्च-जोखिम युक्त जैविक नमूनाहरू चीनबाट ल्याएर गोप्य रूपमा प्रयोगशालाहरूमा पुर्‍याउने कार्यमा संलग्न थिए। अनुसन्धानमा खुलेको छ कि उक्त फफूँद प्रजाती विशेषतः अन्न बालीहरूमा आक्रमण गर्ने क्षमतायुक्त छ, जसले हजारौं किसानको जीविका, कृषि प्रणाली र खाद्य आपूर्ति शृंखलामा गम्भीर असर पुर्‍याउन सक्छ।

यो घटनाले चीनप्रतिको विश्वको बढ्दो सुरक्षा चिन्तालाई थप पुष्टि गरिरहेको छ। केवल सैन्य या साइबर हमलामार्फत नभई, अब जैविक माध्यमबाट समेत राष्ट्रहरूको आन्तरिक संरचना कमजोर पार्ने रणनीति अपनाइँदैछ भन्ने तथ्यलाई यसले उजागर गरेको छ। अमेरिकाले यस मामिलालाई जैविक युद्धको सम्भावित प्रारम्भिक संकेतका रूपमा लिएको छ र अनुसन्धान व्यापक रूपमा अघि बढाइएको छ।

नेपालका लागि यो घटनाक्रम चेतावनीसरह छ। कृषिमा आधारित मुलुक नेपालले जैविक सुरक्षालाई केवल कीट नियन्त्रण वा मल-बीउको गुणस्तरसँग जोडेर हेर्ने पुरानो दृष्टिकोण त्याग्नुपर्छ। आजको विश्वमा जैविक सुरक्षा सिधा राष्ट्रिय सुरक्षा र कूटनीतिक सम्बन्धसँग गाँसिएको छ। चीनको जस्तो शक्तिशाली राष्ट्रबाट यस्ता गतिविधिहरू हुनु केवल आर्थिक प्रतिस्पर्धाको पाटो होइन, भू-रणनीतिक दबाबको खतरा पनि हो — जसबाट साना राष्ट्रहरू सजग रहनैपर्छ।