एक अभूतपूर्व र ऐतिहासिक क्षणमा, संयुक्त राज्य अमेरिकाले इरानका तीन अति संवेदनशील परमाणु साइटहरूमा सीधा हवाई आक्रमण गरेको छ, जसले इरान–इजरायल द्वन्द्वलाई नयाँ स्तरमा पुर्‍याएको छ। अमेरिकी राष्ट्रपति डोनाल्ड ट्रम्पको आदेशमा गरिएको यो आक्रमणले विश्व राजनीतिमा हलचल मच्चाएको छ।

प्रमुख लक्षित स्थलहरूमध्ये कुम नजिकको फोर्डो युरेनियम समृद्धि केन्द्र, नतान्ज र इस्फाहानका भूमिगत परमाणु प्रतिष्ठानहरू समावेश छन्। यी सबै स्थलहरू इरानको गहिरो पहाडी क्षेत्रभित्र रहेका थिए र अन्तर्राष्ट्रिय रूपमा 'कडा सुरक्षा युक्त' भनेर चिनिन्थे। तर अमेरिकाले गुआमबाट प्रक्षेपित B-2 स्पिरिट स्टेल्थ बमवर्षक विमानद्वारा 'म्यासिभ अर्डेनेस पेनिट्रेटर' (GBU-57) बम प्रयोग गर्दै ती स्थलहरूमा गम्भीर क्षति पुर्‍याएको पुष्टि भएको छ।

फोर्डो साइट, जुन तेहरानबाट करिब ६० माइल दक्षिणमा अवस्थित छ, इरानको सबैभन्दा गोप्य र सुरक्षित परमाणु केन्द्र मानिन्छ। यसको तहखानामा रहेका युरेनियम संवर्धन संयन्त्रहरू विनष्ट हुनु इरानको दीर्घकालीन आणविक योजनामा ठुलो झट्का हो। इस्रायली सेनाले केही दिनयता यी साइटहरूलाई लक्षित गर्दै आएको भए पनि, अमेरिका बिना ती संरचनामा गहिरो क्षति पुर्‍याउन नसक्ने बताइएको थियो।

राष्ट्रपति ट्रम्पले यस आक्रमणलाई "संयुक्त राज्य अमेरिका, इजरायल र विश्वका लागि ऐतिहासिक घडी" भनेका छन्। उनले इरानलाई तुरुन्तै आक्रामक क्रियाकलाप रोक्न आग्रह गरेका छन्। ट्रम्पको आकस्मिक रूपमा वाशिङटन फर्कनु र सिचुएसन रुममा बस्नुले परिस्थितिको गम्भीरता स्पष्ट देखाएको थियो।

तर अमेरिकाको यस कदमले इरानभित्र रोष सिर्जना गरेको छ। इरानी नेताहरूले अमेरिका अझ गहिरो रूपमा संलग्न भए “अत्यन्तै खतरनाक नतिजा” आउने चेतावनी दिएका छन्। इजरायलमाथि इरानबाट क्षेप्यास्त्र र ड्रोन आक्रमणहरू यथावत् जारी छन्, जसमा अहिलेसम्म सयौंको मृत्यु र हजारौं नागरिक घाइते भएका छन्। दुबै देशका नागरिकहरूमाथि यो युद्धको सबैभन्दा ठूलो प्रभाव परेको छ।

इस्रायली सेनाले पनि इरानका तीन वरिष्ठ सैन्य कमाण्डरहरू, जसमा सईद इजादी पनि छन्, मारिएको दाबी गरेको छ। इजादीलाई ७ अक्टोबरको इजरायलमाथिको आक्रमण योजनाकार मानिन्छ। उपग्रह तस्बिरहरूले दक्षिण र मध्य इरानका हतियार भण्डारमा गरिएको आक्रमणपछि परमाणु पूर्वाधारमा भएको क्षति पुष्टि गरेका छन्। यद्यपि अहिलेसम्म कुनै रेडियोलोजिकल चुहावट नभएको अधिकारीहरूले जनाएका छन्।

दुवै पक्षबाट लगातार भइरहेको आक्रमण र चेतावनीबीच अन्तर्राष्ट्रिय समुदायले बारम्बार वार्ता र संयमताको आह्वान गर्दै आएको छ। तर न इरान झुक्न तयार छ, न इजरायल पछि हट्ने संकेत देखिन्छ। यस्तो अवस्थामा द्वन्द्व दीर्घकालीन बन्ने डर अझ गहिरिएको छ।

तेहरानदेखि तेलअभिभसम्म, क्षेप्यास्त्र र ड्रोनहरूले आकाश अन्धकारमय बनाएका छन्। दुवै देशका आम नागरिकहरू बंकरमा लुकेका छन्, बालबालिका त्रासमा छन्, र सीमामा बसोबास गर्ने परिवारहरू पलायन गर्न बाध्य छन्। युद्ध र कूटनीति बीचको सन्तुलन झन् नाजुक बनेको छ।

यस्तो संवेदनशील घडीमा अन्तर्राष्ट्रिय नेताहरूको विवेक, संयमता र मानवीय दृष्टिकोणले मात्रै स्थितिलाई सन्तुलनमा ल्याउन सक्नेछ। तर अहिलेका लागि, मध्यपूर्वको आकासमा बारुदको गन्ध अझ गाढा बनेको छ।