कैलाली कारागारमा क्षमताभन्दा पाँच गुणा बढी कैदीबन्दी रहेको अवस्थालाई सुधार गर्न प्रदेश सरकारले तत्काल कदम चाल्ने भएको छ। आइतबार राति मुख्यमन्त्री कमलबहादुर शाहको अध्यक्षतामा बसेको प्रदेश सुरक्षा समितिको बैठकले हेलोजन लाइट, सिसी क्यामरा जडानदेखि छाना मर्मतसम्मका काम तत्काल सुरु गर्ने निर्णय गरेको हो।

१७५ जनाको क्षमता भएको कारागारमा हाल ६९९ कैदी छन्। कैदी संख्याको अत्यधिक भीडका कारण उत्पन्न सुरक्षा चुनौती न्यूनीकरणका लागि कैदी व्यवस्थापनबारे कारागार विभागसँग समन्वय गर्ने र सुरक्षाकर्मीको प्रत्येक तीन महिनामा अदलीबदली गर्ने व्यवस्था मिलाइनेछ।

बैठकले कारागार ऐन संशोधनको सिफारिस संघीय सरकारलाई गर्ने, खाद्यान्न तथा आवश्यक सामग्रीको निगरानी कडा पार्ने, कैदीलाई मनोवैज्ञानिक परामर्श र पुस्तक उपलब्ध गराउने निर्णय पनि गरेको छ।

शुक्रबार राति भएको कैदीबिचको झडपमा परी मृत्यु भएका धनगढी उपमहानगरपालिका–४ का ४० वर्षीय भरत चौधरीका परिवारलाई प्रदेश सरकारले पाँच लाख रुपैयाँ सहयोग गर्ने भएको छ। घटनामा ४७ कैदी घाइते भएका छन्, जसको उपचार सरकारी खर्चमा धनगढी र काठमाडौंमा भइरहेको छ।

झडपपछि करिब ४० घण्टासम्म कैदीको नियन्त्रणमा रहेको कारागार राष्ट्रिय मानव अधिकार आयोगको रोहबरमा सामान्य अवस्थामा फर्किएको छ। अब भेटघाट र नियमित गतिविधि पुनः सुरु भएको कारागार प्रशासनले जनाएको छ।