काठमाडौँ जिल्ला प्रहरी परिसरमा बैंकिङ कसुरसम्बन्धी मुद्दा अन्य अपराधभन्दा बढी दरमा बढिरहेको देखिएको छ। परिसर प्रमुख विश्व अधिकारीका अनुसार बितेको एक वर्षमा परिसरमा दर्ता भएका १२ हजार ९१५ मुद्दामध्ये ६ हजार ५५३ मुद्दा बैंकिङ कसुरका मात्र हुन्।

उहाँले दिएको तथ्यांकअनुसार सहकारी ठगी, अनुचित लेनदेन, विद्युतीय अपराध, साइबर अपराध र अभौतिक मुद्रासम्बन्धी अपराधका घटनासमेत क्रमशः वृद्धि भइरहेका छन्। अहिले परिसरमा दैनिक औसत ३५ मुद्दा दर्ता हुने गरेको छ।

सहकारी ठगीका घटनामा पनि वृद्धि देखिएको छ। आव २०८०/८१ मा यस्तो प्रकृतिका २६ मुद्दा दर्ता भएका थिए भने चालु आव २०८१/८२ मा यो संख्या ३२ पुगेको छ। त्यस्तै, आव २०८१/८२ मा ज्यानमार्ने उद्योगका १४० मुद्दा दर्ता भएको प्रहरी तथ्यांकले देखाएको छ।

विशेषगरी वित्तीय क्षेत्रसँग सम्बन्धित अपराधको बढ्दो प्रवृत्ति प्रहरीको चुनौती बनेको अधिकारी बताउँछन्। उनका अनुसार, यसले कानुनी कारबाहीको दायरा मात्र नभई आर्थिक सुरक्षा र जनविश्वासमा समेत असर पार्ने जोखिम बोकेको छ। परिस्थितिले देखाउँछ-नागरिक र संस्थागत दुवै तहमा सचेतना, नियमन र प्रविधिगत सुरक्षामा तत्कालै ध्यान दिनु अपरिहार्य हुँदै गएको छ।