बाँके जिल्लामा गएको आर्थिक वर्ष २०८१/८२ मा हराएका महिला, बालबालिका र ज्येष्ठ नागरिकमध्ये अधिकांशलाई प्रहरीले फेला पारेर परिवारमा जिम्मामा लगाइएको छ। जिल्ला प्रहरी कार्यालय बाँकेका प्रवक्ता प्रहरी नायब उपरीक्षक (प्रनाउ) दीपक पातलीका अनुसार उक्त अवधिमा हराएको भन्दै ५५५ वटा निवेदन दर्ता भएका थिए। तीमध्ये ५१४ जनालाई प्रहरीले खोजी गरी परिवारको जिम्मामा बुझाएको हो।

प्रनाउ पातलीका अनुसार उद्धारका क्रममा परिवारका सदस्यहरू निकै भावुक र खुसी देखिएका थिए। प्रहरी तथ्यांकअनुसार सोही वर्षमा जिल्लाका विभिन्न स्थानमा अलपत्र अवस्थामा भेटिएका २४९ जना महिला, बालबालिका र ज्येष्ठ नागरिकलाई पनि उद्धार गरिएको छ। तीमध्ये ९४ जनालाई संरक्षणका लागि विभिन्न संस्थामा पठाइएको उनले जानकारी दिए।

नेपाल–भारत सीमा नाका जमुनाहाबाट मात्रै ९०७ जनाको उद्धार गरिएको तथ्याङ्क प्रहरीले सार्वजनिक गरेको छ। भारततर्फ जाने क्रममा शंकास्पद देखिएका महिलाहरू र बालबालिकासँग सोधपुछ गर्दा जोखिमपूर्ण यात्रा वा काममा जान लागेको पाइएपछि उनीहरूलाई रोकथाम गरी घर फर्काइएको प्रहरीको भनाइ छ। यसलाई मानव बेचबिखन नियन्त्रणमा महत्वपूर्ण कदमका रूपमा लिइएको छ।

समुदायसँगको सहकार्यलाई प्राथमिकतामा राख्दै प्रहरीले गत वर्ष मात्रै एक हजार ९४ पटक सचेतनामूलक कार्यक्रम सञ्चालन गरेको छ। तीमध्ये लागुऔषध दुरुपयोग, साइबर अपराध, मानव बेचबिखन, आत्महत्या रोकथाम, अल्पसङ्ख्यकसँगको सहकार्य, नागरिक सुनुवाइ र चोरीसम्बन्धी सचेतना प्रमुख विषय थिए।

यस्तै ट्राफिक नियमपालनमा सुधार ल्याउन प्रहरीले दुई हजार ६२४ कार्यक्रम सञ्चालन गरेको छ। लेन अनुशासन, जेब्रा क्रसिङ प्रयोग र ट्राफिक लाइटबारे विद्यार्थी, चालक तथा सर्वसाधारणलाई जानकारी दिइएको प्रहरीले जनाएको छ।

यसरी तथ्याङ्क हेर्दा बाँकेमा प्रहरीको प्रयास हराएको वा जोखिमपूर्ण अवस्थाबाट नागरिकलाई सुरक्षित राख्ने महत्वपूर्ण आधार बनेको देखिन्छ। यद्यपि हराउने घटना निरन्तर भइरहेको वास्तविकताले अझ सशक्त निगरानी र दीर्घकालीन समाधान खोज्नुपर्ने चुनौतीलाई पनि उजागर गरेको छ।