नेपालगन्जस्थित बिसमिल्ला होटेलका सञ्चालक मोहम्मद उमर साईलाई अखाद्य रङ प्रयोग गरी उपभोक्ताको स्वास्थ्यसँग खेलबाड गरेको आरोपमा जिल्ला अदालत बाँकेले कैद र जरिवानाको सजाय सुनाएको छ। अदालतका अनुसार साईलाई खाद्य स्वच्छता तथा गुणस्तर ऐन, २०८१ बमोजिम छ महिना कैद र एक लाख रुपियाँ जरिवाना हुने गरी सजाय तोकिएको हो।

खाद्य प्रविधि तथा गुण नियन्त्रण कार्यालय नेपालगन्जका खाद्य निरीक्षक रामहरि लामिछानेले दायर गरेको मुद्दामाथि न्यायाधीश केशवराज चपाईको इजलासले फैसला सुनाएको हो। अदालतले मुलुकी फौजदारी कार्यविधि संहिता, २०७४ को दफा १३१ अनुसार सजाय कार्यान्वयन हुने जनाएको छ।

कार्यालयले गरेको स्थलगत अनुगमनमा होटेलमा गम्भीर लापरबाही भेटिएको थियो। बिरयानी, कबाफ र शोर्माजस्ता परिकारमा कोलटार रङ मिसाइएको, पकाउने भान्सा शौचालयसँगै जोडिएको, वरिपरि अत्यधिक फोहोर भएको, झिँगा भन्केको, फ्रिजमा दूषित अवस्थामा मासु भण्डारण गरिएको तथ्य सार्वजनिक गरिएको हो। साथै, प्याज, राइता, ब्रेडक्रम र चिकेनजस्ता सामग्री प्लास्टिकका भाँडामा अव्यवस्थित रूपमा राखिएको पाइएको थियो।

यसैगरी, भण्डारण कक्ष अत्यन्त फोहोर रहेको, कच्चा पदार्थ राख्ने ठाउँमै फोहोर फाल्ने गरिएको र खाद्य पदार्थ वरिपरि थुक्ने जस्ता गतिविधि समेत भेटिएका थिए। यी प्रमाणका आधारमा कार्यालयले गत वर्ष २०८१ जेठ ५ गते साईविरुद्ध अदालतमा मुद्दा दायर गरेको थियो।

उपभोक्ताको स्वास्थ्यलाई खतरामा पार्ने यस्तो गतिविधि रोकथामका लागि अदालतको यो फैसला चेतावनीका रूपमा लिइएको छ। यस्तै मुद्दा अघिल्लो आर्थिक वर्षमा मात्र कार्यालयले छवटा दायर गरेको तथ्याङ्कले देखाउँछ, जसले खाद्य सुरक्षाप्रति अझै गम्भीर ध्यान दिनुपर्ने आवश्यकता उजागर गर्छ।