महोत्तरी जिल्लाको बर्दिवास नगरपालिका–९ स्थित रातुखोला किनारमा सशस्त्र प्रहरीले करिब ४६ लाख ५० हजार रुपैयाँ बराबरको संचार उपकरण बरामद गरेको छ। सशस्त्र प्रहरी बल नेपालका अनुसार भदौ ९ गते विशेष सूचनाको आधारमा खटिएको सुरक्षा टोलीले बिना बिलविजक संचार सामाग्री बरामद गरेको हो।

बरामद गरिएका सामग्री मधेश प्रदेश ०२–००१ स ५२४८ नम्बरको ई–रिक्सामा लोड गरिएको अवस्थामा भेटिएको प्रहरीले जनाएको छ। कागजात र बिलबिजक नभएको ती उपकरण ‘भ्चष्अककयल’ कम्पनीको ‘डडटघ द्यद्धण्’ मोडलका आठ वटा सेट रहेको पुष्टि गरिएको छ। प्रहरीका अनुसार ती उपकरण दुरसंचार टावरमा प्रयोग हुने प्रकारका भए पनि कुन प्रयोजनका लागि ल्याइएका हुन् भन्ने प्रष्ट खुलेको छैन।

सशस्त्र प्रहरी बलका सह–प्रवक्ता नायव उपरीक्षक शैलेन्द्र थापाले भने, “विशेष सूचनाको आधारमा सुरक्षा बेस भंगाहा र पशुपतिनगरबाट खटिएको टोलीले उक्त संचार सामग्री नियन्त्रणमा लिएको हो।” उनका अनुसार बरामद सामग्री र सोही रिक्सालाई आवश्यक कारबाहीका लागि भन्सार कार्यालय जलेश्वरमा बुझाइएको छ।

यो घटनाले सीमावर्ती क्षेत्रमा बिना कागजात भित्रिने सामग्री नियन्त्रण गर्ने चुनौती र भन्सार प्रशासनको निगरानीलाई पुनः प्रश्नमा ल्याएको छ। दुरसंचार जस्तो संवेदनशील क्षेत्रसँग सम्बन्धित उपकरण गैरकानुनी ढंगले ओसारपसार हुनु नियमनात्मक संस्थाका लागि चनौतीपूर्ण विषयका रूपमा देखिएको छ।

अहिले बरामद सामग्री भन्सारमा बुझाइएपछि थप अनुसन्धान र कानूनी प्रक्रिया अघि बढ्ने सशस्त्र प्रहरीले जनाएको छ।