लागुऔषध नियन्त्रण ब्युरो शाखा कार्यालय बर्दीबासले ठूलो परिमाणको गाँजा बरामद गरेको छ। आइतबार साँझपख रामगोपालपुर नगरपालिका–५ बजार चौकमा चेकजाँचका क्रममा ना. ६ ख २९१९ नम्बरको ट्रकबाट ४६५ किलो गाँजा बरामद भएको हो।

विशेष सूचनाको आधारमा ब्युरो प्रमुख प्रहरी नायब निरीक्षक (प्रनानी) सरोज अधिकारीको नेतृत्वमा खटिएको टोलीले ट्रक रोकेर जाँच गर्दा उक्त गाँजा फेला पारेको हो। गाँजा सेतो बोरा र रातो प्लास्टिकमा बेरेर ट्रकभित्र लुकाइएको अवस्थामा फेला परेको थियो।

यस घटनामा संलग्न भएको आरोपमा मकवानपुरको राक्सिराङ गाउँपालिका–५ का २६ वर्षीय ट्रक चालक मानबहादुर मुक्तानलाई नियन्त्रणमा लिइएको छ। मुक्तानलाई आवश्यक अनुसन्धान तथा कारबाहीका लागि जिल्ला प्रहरी कार्यालय महोत्तरीमा बुझाइएको ब्युरो प्रमुख अधिकारीले जानकारी दिनुभयो।

हालै बर्दीबास–जलेश्वर सडकखण्डमा लागुऔषध तस्करीको गतिविधि बढिरहेको सूचनाका आधारमा प्रहरी सक्रिय रहेको छ। थप अनुसन्धान जारी रहेको प्रहरीले जनाएको छ।